İQTİSADİYYAT
ELEKTRİK KABELLƏRİ VƏ XƏTLƏRİ DƏYİŞDİRİLİR
“Barmek-Azərbaycan” Şirkəti Bakı şəhərinin, xüsusilə şəhərətrafı qəsəbə və kəndlərin elektrik şəbəkəsinin texniki təchizatını yaxşılaşdırmaq məqsədi ilə 18,5 milyon ABŞ dolları məbləğində vəsait ayırmışdır.
Şirkətin mətbuat xidmətinin rəhbəri Tanrıverdi Mustafayev AZƏRTAC-ın müxbirinə demişdir ki, bu vəsait əsasən yararsız hala düşmüş yeraltı elektrik kabellərinin və hava xətlərinin dəyişdirilməsinə sərf olunacaqdır. İlk növbədə şəhərin özündə labüd təhlükə mənbəyi olan qarışıq hava xətləri normativə uyğun şəkildə səliqəyə salınacaq, onlar bütünlüklə daha keyfiyyətli naqillərlə, bəzi yerlərdə isə yeraltı kabellər daha davamlı və “uzunömürlü” kabellərlə əvəz olunacaqdır. Bu işlərin 2004-cü ilin sonunadək başa çatdırılması nəzərdə tutulub.
Hazırda paytaxtın Qaradağ, Yasamal, Sabunçu və Əzizbəyov rayonlarının ərazilərində kabel və xətlərin dəyişdirilməsinə başlanmışdır.