Əli Abbasov: Azərbaycan öz ərazisində heç vaxt İran əleyhinə təbliğat fəaliyyətinə icazə verməyəcəkdir
Tehran, 19 iyun (AZƏRTAC). İran İslam Respublikasında səfərdə olan Azərbaycan Respublikasının rabitə və yüksək texnologiyalar naziri Əli Abbasov iyunun 19-da bu ölkənin Dövlət Radio və Televiziya Şirkətinin rəhbəri İzzətulla Zərqami ilə görüşmüşdür.
Görüşdə media sahəsində qarşılıqlı texniki əməkdaşlıq və birgə layihələrin həyata keçirilməsi məsələləri müzakirə olunmuşdur.
İ.Zərqami demişdir ki, iki ölkə arasındakı media əlaqələri qarşılıqlı ehtirama əsaslanmalıdır. Bu sahədə əməkdaşlıq etmək üçün həll olunmayan problem yoxdur. İran televiziya sahəsində Azərbaycan ilə kinofilm, musiqi, serial, cizgi filmləri, televiziya tamaşalarının mübadiləsini apara bilər. Qeyd olunmuşdur ki, bu sahədə əməkdaşlıq memorandumunun imzalanması zəruridir.
Əli Abbasov media sahəsində əməkdaşlığın vacibliyini vurğulayaraq bildirmişdir ki, Azərbaycan öz ərazisində heç vaxt İran əleyhinə təbliğat fəaliyyətinə icazə verməyəcəkdir.
İki saat davam edən görüşdə qarşılıqlı faydalı əməkdaşlığın perspektivləri ətrafında fikir mübadiləsi aparılmışdır.
Görüşdə Azərbaycanın İrandakı səfiri Cavanşir Axundov da iştirak etmişdir.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
