Elmin İnkişafı Fondu növbəti “Şuşa qrantı” birgə müsabiqəsinin nəticələrini açıqlamışdır
Bakı, 7 noyabr (AZƏRTAC). Azərbaycan Respublikasının Prezidenti yanında Elmin İnkişafı Fondu (EİF) Qarabağla bağlı ölkədə aparılan elmi tədqiqatları stimullaşdırmaq, regional və beynəlxalq səviyyədə araşdırmaları təmin etmək məqsədi ilə 2012-ci il mayın 8-də “Şuşa qrantı” müsabiqəsini təsis etmişdir. Həmin il birinci “Şuşa qrantı” müsabiqəsi keçirilmiş, qalib layihələr müəyyənləşdirilmişdir. Müsabiqənin nəticələri üzrə yerinə yetirilən dörd layihədən ikisi beynəlxalq xarakterlidir və hazırda Almaniya və Ukrayna alimləri ilə birgə uğurla icra edilir.
EİF-dən AZƏRTAC-a bildirmişlər ki, Fond ikinci “Şuşa qrantı” müsabiqəsini UNESCO üzrə Azərbaycan Respublikasının Milli Komissiyası ilə birlikdə bu il mayın 10-da elan etmişdir.
Müsabiqənin məqsədi bütövlükdə Qarabağın tarixinin, bu diyarın qədim və rəngarəng qeyri-maddi və maddi-mədəni irsinin, memarlığının, arxeologiyasının, iqtisadiyyatının, fauna və florasının, təbii sərvətlərinin, mədəniyyət tarixinin, etnoqrafiyasının, ədəbiyyatşünaslıq, dilçilik, sənətşünaslıq və incəsənət sahələrinin, eləcə də Ermənistan-Azərbaycan, Dağlıq Qarabağ münaqişəsinin, Xocalı soyqırımının tədqiqi və bu barədə həqiqətlərin dünya elmi ictimaiyyətinə çatdırılması, Dağlıq Qarabağ münaqişəsinin yaratdığı problemlərlə bağlı mədəni, ekoloji, tibbi, bioloji və aqrar məsələlərin, qaçqın və məcburi köçkünlərin hüquqlarının qorunmasının və digər məsələlərin kompleks şəkildə elmi əsaslarla dərindən tədqiq olunmasının dəstəklənməsidir.
Müsabiqə çərçivəsində təbiət, dəqiq, texniki, humanitar və ictimai elm sahələrində fundamental-tətbiqi xarakterli elmi-tədqiqat proqram və layihələrinin dəstəklənməsi nəzərdə tutulmuşdur.
Müsabiqə müddətində Elmin İnkişafı Fondunun icraçı direksiyası qrant iddiaçılarına kömək məqsədi ilə bir neçə məsləhət seminarı keçirmiş, telefon və elektron-poçt vasitəsilə edilmiş müraciətləri cavablandırmış, ortaya çıxan suallara aydınlıq gətirmişdir.
Müsabiqənin keçirilməsi qaydalarına uyğun olaraq, təqdim edilmiş layihələr onların ideyalarının obyektiv formada orijinal ifadəsi (elektron və kağız daşıyıcılarda) və əqli nəticələrinin müəlliflik hüququnun qorunması məqsədilə Azərbaycan Respublikası Müəllif Hüquqları Agentliyində müvafiq qeydiyyatdan keçirilmişdir. Bu layihələrin texniki və elmi ekspertizası işinə EİF-in daimi ekspertləri, müstəqil elmi ekspertlər, eləcə də xarici ekspertlər cəlb olunmuşlar.
Təqdim olunmuş layihələrin cari müsabiqənin elmi prioritetlərinə uyğunluq dərəcəsi müəyyənləşdirilmiş, layihələrin elmi səviyyəsi, onların yerinə yetirilməsi imkanları və potensialı, gözlənilən elmi nəticələri mümkün tətbiq ehtimalı üzrə qiymətləndirilmişdir. Layihələr EİF-in Himayədarlar Şurasında da müzakirə olunmuşdur.
İkincisi “Şuşa qrantı” birgə müsabiqəsi çərçivəsində 10 qalib layihə müəyyənləşdirilmişdir. Bu layihələrin maliyyələşdirilməsi məqsədi ilə Elmin İnkişafı Fondundan 300.000 manat məbləğində qrant ayrılmışdır.
Noyabrın 7-də EİF-in icraçı direksiyasında müsabiqənin nəticələrinin açıqlanması ilə bağlı keçirilmiş tədbirdə ABŞ-da fəaliyyət göstərən “Qarabağ Fondu”nun icraçı direktoru xanım Diana Kohen Altman da iştirak etmişdir.
Elmin İnkişafı Fondu növbəti “Şuşa qrantı” müsabiqələrindən birinin “Qarabağ Fondu” ilə birgə keçirilməsi barədə razılığa gəlmişdir. Əvvəlki iki müsabiqə üzrə yerinə yetirilən layihələrin maraqlı nəticələrinin ABŞ-da “Qarabağ Fondu”nun dəstəyi ilə təqdim və təbliğ olunması məsələsi də razılaşdırılmışdır.
İkinci “Şuşa qrantı” müsabiqəsi üzrə qalib layihələr AMEA-nın Folklor, Memarlıq və İncəsənət, Əlyazmalar, Arxeologiya və Etnoqrafiya, Geologiya, İnsan Hüquqları institutlarında, Azərbaycan Tibb Universitetində, Bakı Dövlət Universitetində, Azərbaycan Respublikasının Prezidenti yanında Dövlət İdarəçilik Akademiyasında, Azərbaycan Memarlıq və İnşaat Universitetində yerinə yetiriləcəkdir. İcraçılar sırasında Bakı Avrasiya Universitetinin, “Sağlam nəsil” İctimai Birliyinin, “Stimul Azərbaycan” MMC-nin, “Azərbərpa” Elmi-Tədqiqat Layihə İnstitutunun alim və mütəxəssisləri də vardır.
Qalib layihələr “Qarabağda xalq oyunları və meydan tamaşaları: genezisi, tipologiyası və poetikası”, “Sovet dövründə Azərbaycanın ərazi problemləri və erməni iddiaları”, “Dağlıq Qarabağda Nərgiztəpə arxeoloji abidələr kompleksi”, “Qarabağ memarlığı X-XIX əsrlərdə”, “Şuşa Azərbaycan mətbuatında (1875-1920-ci illər)”, “Qarabağın geoloji-coğrafi atlası”, “Dağlıq Qarabağ məcburi köçkünlərinin reproduktiv sağlamlıq vəziyyətinin öyrənilməsi”, “Ermənistanın sovetləşməsindən Azərbaycan ərazilərinin işğalınadək (1920-1994-cü illər) erməni iddiaları”, “Ermənistanın Azərbaycana təcavüzünün nəticələri: təhlili xronika (I kitab); Ermənistanın Azərbaycana təcavüzü və beynəlxalq təşkilatlar (II kitab); Ermənistanın Azərbaycana təcavüzü: sənədlər və materiallar (III kitab)”, “Qarabağın maddi-mədəniyyət abidələrinin tədqiqi, virtual bərpası və rekonstruksiyası” istiqamətləri üzrə yerinə yetiriləcəkdir.
Bütün layihələr yerinə yetirildikdən sonra hər bir fundamental-tətbiqi xarakterli layihə üzrə alınmış nəticələri əks etdirən kitab, monoqrafiya və ya atlasın nəşr olunması nəzərdə tutulmuşdur. Bu nəşrlərdən Azərbaycan həqiqətlərinin dünyaya çatdırılması işində də istifadə olunacaqdır.
Elmin İnkişafı Fondu və UNESCO üzrə Azərbaycan Respublikasının Milli Komissiyası ikinci “Şuşa qrantı” birgə müsabiqəsinin qaliblərini təbrik edir, müsabiqə iştirakçılarına və müstəqil elmi ekspertlərə minnətdarlığını bildirir.
Yaxın günlərdə Elmin İnkişafı Fondunun qalib layihə rəhbəri və icraçıları ilə ənənəvi görüşü keçiriləcəkdir.
Bölmənin digər xəbərləri
