Elmira Məmmədova-Kekeç: Qərbi Azərbaycanla bağlı araşdırmalar tarixi yaddaşımızı möhkəmləndirir
Bakı, 16 yanvar, Günel Alıyeva, AZƏRTAC
Kitabda Qərbi Azərbaycanla bağlı çoxsaylı sənəd və arxiv materialları əsasında aparılmış araşdırmalar yer alıb. Ümumilikdə Əfqan Vəliyevin iş prinsipində diqqəti cəlb edən əsas məqam onun elmi faktlara, sənədlərə və tarixi abidələrə istinad etməsidir. Kitabda ən çox bəyəndiyim və təqdir etdiyim cəhətlərdən biri də məhz budur. Buna görə də nəşri böyük məmnuniyyətlə çapa tövsiyə etdim və müsbət rəy bildirdim.
Bu fikirləri AZƏRTAC-a açıqlamasında filologiya elmləri doktoru, Bakı Avrasiya Universitetinin professoru Elmira Məmmədova-Kekeç bildirib.
“Qərbi Azərbaycan bizim əzəli yurdumuzdur, eyni zamanda mənim də vətənimdir. Mən 1988-ci ildə deportasiya olunmuş azərbaycanlı türklərindən biriyəm. Düşünürəm ki, bu cür tədqiqatlar tarixi yaddaşımızın möhkəmlənməsinə xidmət edir”, – deyə o əlavə edib.
Professorun sözlərinə görə, kitabın onlayn formatda hazırlanması və QR kodlar vasitəsilə asan əlçatan olması xüsusi əhəmiyyət daşıyır: “Nəşrin onlayn olması ilk növbədə diqqətəlayiqdir. Eyni zamanda, tarix faktlarına və sənədlərə əsaslanan materialların ciddi şəkildə təqdim olunması elmi mühitdə həm ölkə daxilində, həm də dünya elmi mühitində alimlərimizin öz sözlərini deməsinə və mövqelərini faktlarla təsdiq etməsinə imkan verəcək”.
Bölmənin digər xəbərləri
