Əlyazmalar İnstitutunun əməkdaşı beynəlxalq simpoziumda məruzə edib
Bakı, 22 may, AZƏRTAC
AMEA Məhəmməd Füzuli adına Əlyazmalar İnstitutunun Nizami Gəncəvi əlyazmalarının tədqiqi şöbəsinin böyük elmi işçisi Xoşqədəm Mirzəyeva Avrasiya Yazıçılar Birliyinin prezidenti Yaqub Öməroğlunun xatirəsinə həsr olunmuş II Beynəlxalq Altayşünaslıq Simpoziumunda onlayn iştirak edib.
İnstitutdan AZƏRTAC-a bildirilib ki, Türkiyə, Özbəkistan, Qazaxıstan, Rusiya, Almaniya, Şimali Makedoniya və bir sıra ölkələrdən alimlərin qatıldığı simpoziumda o, “Hekayət-i Padişahı-Bulğar” əsərinin Bakı nüsxəsi” mövzusunda məruzə edib. O, Əlyazmalar İnstitutunda M-478 şifri ilə mühafizə olunan bu əlyazma nüsxəsinin mənəvi, estetik və özünəməxsus xüsusiyyətlərindən, onun tərkibinə daxil olan “Yusif və Züleyxa” məsnəvisi və “Hekayəti-padişahi-Bulqar” əsərindən söz açıb, mövzuya uyğun hazırladığı videoslaydı konfrans iştirakçılarının diqqətinə çatdırıb. X.Mirzəyeva simpoziumda fəal iştirakına, ətraflı və dolğun çıxışına görə təşkilatçı qurumun sertifikatına layiq görülüb.
Qeyd edək ki, Altay dillərinin yazı sistemləri, Altay xalqlarının antropologiyası, arxeologiyası, tarixi və etnologiyası, Koreya, yapon, türk dili və ədəbiyyatı kimi mövzuları özündə əhatə edən simpozium Türkiyənin Bilimdili Assosiasiyasının təşkilatçılığı ilə keçirilib.
Bölmənin digər xəbərləri
