EMTA ötən ayın fəaliyyət istiqamətləri üzrə nəticələrini açıqlayıb
Bakı, 6 may, AZƏRTAC
Cari ilin aprel ayı ərzində istehlakçıların hüquqlarının qorunması, abonentlərin elektrik və istilik enerjisi, təbii qazla təchizatı və digər məsələlərlə bağlı Enerji Məsələlərini Tənzimləmə Agentliyinə (EMTA) bilavasitə və Energetika Nazirliyindən 876 müraciət daxil olub.
Agentlikdən AZƏRTAC-a verilən məlumata görə elektrik enerjisi təchizatı ilə bağlı 144-ü məlumat üçün olmaqla 783 müraciət edilib. Təbii qaz təchizatı ilə bağlı 7-si məlumat xarakterli olmaqla 69 müraciət olunub. İstilik təchizatı ilə bağlı cəmi 10 müraciət edilib. Digər məsələlərlə bağlı 2-si məlumat üçün olmaqla 14 müraciət göndərilib.
Müraciətlərdən 383-ü agentlik tərəfindən araşdırılıb və cavablandırılıb (6 müraciət müvafiq qaydada baxılması və tədbir görülməsi üçün aidiyyəti quruma göndərilib), 1 müraciət Energetika Nazirliyi ilə müştərək icra olunub, 339 müraciət hazırda baxılma prosesindədir, 153 məlumat xarakterli müraciətdən 64-ü qaldırılan problemlərin həlli ilə bağlı təşəkkür məktubu olub. Bununla yanaşı, yeni, yenidən qurulan, istifadə olunmasına icazə verilmiş gücü artırılan və enerji təchizat sxemini dəyişən 21 tikinti obyektinin xarici elektrik enerjisi təchizatı üçün quraşdırılmış elektrik qurğularına istismara buraxılış aktı verilib. 15 razılaşdırılmış layihəyə əsasən tikintisi başa çatdırılmış sənaye qaz qurğularının istismarına icazə verilib. Eyni zamanda, “AzərEnerji” ASC və “Azərişıq” ASC-nin nümayəndələrinin iştirakı ilə 16 hesablaşma elektrik sayğacının texniki vəziyyətinə baxış keçirilib.
Agentliyin səlahiyyətlərinə aid olan Azərbaycan Respublikası İnzibati Xətalar Məcəlləsinin müvafiq maddələri üzrə 85 inzibati xəta haqqında işə baxılıb, onlardan 84 iş üzrə inzibati tənbeh vermə haqqında qərar, 1 iş üzrə isə icraata xitam verilməsi barədə qərar qəbul olunub. Həmçinin elektrik qurğularının texniki istismarı, təhlükəsizlik texnikası qaydalarına əməl olunması və elektrik enerjisindən istifadənin vəziyyətinin araşdırılması məqsədilə 106 nəzarət tədbiri keçirilib.
İstilik qurğularının texniki istismarı, təhlükəsizlik texnikası qaydalarına əməl olunması və istilik enerjisindən istifadənin vəziyyətinin araşdırılması məqsədilə 1 nəzarət tədbiri keçirilib.
Qazdan səmərəli istifadənin, “Qazdan istifadə Qaydaları”nın və qaz qurğularının etibarlı istismarının, həmçinin digər normativ-hüquqi aktların tələblərinə əməl olunmasının vəziyyətinin araşdırılması məqsədilə 70 nəzarət tədbiri keçirilib.
Agentlik tərəfindən hesabat dövrü ərzində 32 müəssisədə 68 nəfər olmaqla elektrotexniki heyətin və elektrik təsərrüfatlarına cavabdeh şəxslərin texniki istismar, təhlükəsizlik texnikası qaydaları üzrə peşə bilikləri yoxlanılıb, yoxlama nəticəsində biliklərin artırılması üzrə təkliflər verilib, bu istiqamətdə müvafiq şəxslərə metodiki yardım göstərilib.
Bölmənin digər xəbərləri
