ENERGETİKA SAHƏSİNDƏ ƏLAQƏLƏRİN GENİŞLƏNDİRİLMƏSİ MƏSƏLƏLƏRİ MÜZAKİRƏ OLUNMUŞDUR

25.05.2006 [19:08]
Çap et
A⁺ A^-

AZƏRTAC xəbər verir ki, Milli Məclis sədrinin müavini Valeh Ələsgərov mayın 25-də ölkəmizdə səfərdə olan Avropa Parlamentinin deputatı, AP-nin sosialist qrupunun vitse-prezidenti Yohanes Svoboda və onu müşayiət edən şəxslərlə görüşmüşdür. Valeh Ələsgərov Azərbaycanın bütün beynəlxalq təşkilatlarla, eləcə də Avropa Parlamenti ilə əlaqələrin inkişafında maraqlı olduğunu bildirmiş, bu cür səfərlərin münasibətlərimizin genişlənməsində rolunu yüksək qiymətləndirmişdir. Milli Məclis sədrinin müavini ölkəmizin zəngin təbii ehtiyatlara, xüsusilə karbohidrogen ehtiyatlarına malik olduğunu, Azərbaycan neftinin və neft məhsullarının Avropa bazarlarına çıxarılmasının hər iki tərəf üçün əhəmiyyətini vurğulamışdır.

Yohanes Svoboda bildirmişdir ki, Azərbaycana səfərdən məqsəd ikitərəfli əlaqələrin inkişafına dair danışıqlar aparmaq, münasibətləri daha da genişləndirməkdir. Qonaq, bu gün dünyada Azərbaycan neftinə böyük maraq olduğunu və Avropa ölkələrinin bu işə diqqətinin artırılmasının vacibliyini nəzərə çarpdırmışdır.

Sonra görüşdə Azərbaycan neftinin Avropa bazarlarına çıxarılması imkanlarının genişləndirilməsi, ikitərəfli əlaqələrin inkişaf perspektivləri və maraq doğuran digər məsələlər ətrafında geniş fikir mübadiləsi aparılmışdır.

Görüşdə Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov, Avropa Parlamentinin deputatı, Sosialist qrupunun digər vitse-prezidenti Jan-Marinus Viersma və digər rəsmi şəxslər iştirak etmişlər.

ENERGETİKA SAHƏSİNDƏ ƏLAQƏLƏRİN GENİŞLƏNDİRİLMƏSİ MƏSƏLƏLƏRİ MÜZAKİRƏ OLUNMUŞDUR

MÜƏLLİFLƏ ƏLAQƏ

Bölmənin digər xəbərləri