İQTİSADİYYAT
ENERGETİKLƏRİMİZ FİNLANDİYADA OLMUŞLAR
“Azərenerji” Səhmdar Cəmiyyətinin mətbuat xidmətindən AZƏRTAC-a bildirmişlər ki, qurumun bir qrup mütəxəssisi ölkə ərazisində quraşdırılacaq modul stansiyaların iş prinsipləri ilə tanışlıq məqsədi ilə Finlandiyanın Vaasa şəhərində olmuşdur.
“Vartsila” şirkətinə məxsus zavodda keçirilmiş sınaq zamanı stansiyanın xüsusiyyətlərinin şirkətlə imzalanmış müqavilədəki göstəricilərlə üst-üstə düşdüyü təsdiqlənmişdir.
Modul stansiyası 1 kilovat-saat elektrik enerjisinin istehsalına 270 qram yanacaq sərf edir. Müqayisə üçün deyək ki, Əli Bayramlı DRES-də bu göstərici 450 qrama bərabərdir.
Sınaqdan sonra aqreqat sökülərək onun hissələrinə baxış keçirilmiş və nəticələr mütəxəssislərimizi qane etmişdir.
Modul stansiyalardan dünyanın bir çox ölkələrində istifadə olunur. Türkiyədə bu tipli 172 stansiya 1500 kilovat-saat elektrik enerjisi istehsal edir.