Erməni millətçilərinin törətdikləri soyqırımları xalqımızın yaddaşından heç zaman silinməyəcək
Şəki-Zaqatala bölgəsi, 31 mart, Mustafa Dadaşov, AZƏRTAC
1918-ci ilin martında erməni millətçiləri tərəfindən azərbaycanlıların kütləvi şəkildə öldürülməsi, soyqırımına məruz qalması XX yüzillikdə dünya tarixinin ən qanlı səhifələrindən biri hesab olunur.
AZƏRTAC xəbər verir ki, soyqırımı qurbanlarının xatirəsi Şəki-Zaqatala bölgəsi rayonlarında da ehtiramla yad edilib.
31 mart - Azərbaycanlıların Soyqırımı Günü ilə əlaqədar Qax şəhərində keçirilən elmi-praktiki konfransın iştirakçıları əvvəlcə Şəhidlər xiyabanına gələrək, Vətənimizin azadlığı uğrunda canlarından keçən igid həmvətənlərin məzarları üzərinə gül-çiçək düzüb, şəhidlərin xatirəsini ehtiramla anıblar.
Təhsil şöbəsinin akt zalında keçirilən konfransı rayon icra hakimiyyətinin başçısı Musa Şəkiliyev açaraq, Azərbaycan xalqına qarşı yüz illər boyu davam edən soyqırımı və təcavüz siyasətinin məqsədi, mahiyyəti və tarixi kökləri barədə məlumat verib, ermənilərin azərbaycanlılara qarşı zaman-zaman həyata keçirdikləri soyqırımı, törətdikləri vəhşiliklər barədə danışıb.
Məruzə və çıxışlarda bildirilib ki, XX əsrin əvvəllərində xalqımıza qarşı açıq şəkildə genişmiqyaslı qanlı aksiyalar həyata keçirməyə başlayan erməni daşnakları 1918-ci ilin martında Bakı, Şamaxı, Quba, Lənkəran, Qarabağ, Naxçıvan, İrəvan və digər bölgələrdə kütləvi qırğınlar törədib, on minlərlə soydaşımızı qətlə yetiriblər. Xalqımıza qarşı etnik təmizləmə siyasəti sonrakı dövrlərdə də davam etdirilib. Təcavüzkar ermənilərin apardıqları işğalçılıq müharibəsi nəticəsində torpaqlarımızın 20 faizi zəbt edilib, 20 minədək azərbaycanlı şəhid olub, bir milyona yaxın həmvətənimiz doğma torpaqlarından qovulub.
Konfransda soyqırımı ilə bağlı həqiqətlərin dünya ictimaiyyətinə çatdırılmasında ümummilli lider Heydər Əliyevin tarixi xidmətləri bir daha xatırlanıb, hazırda bu istiqamətdə ölkə rəhbərliyi, həmçinin Heydər Əliyev Fondu tərəfindən məqsədyönlü iş aparıldığı diqqətə çatdırılıb.
X X X
Azərbaycanlıların Soyqırımı Günü ilə əlaqədar martın 31-də Zaqatala şəhərində soyqırımı qurbanlarının xatirəsinə ucaldılmış abidənin qarşısında anım mərasimi keçirilib.
Tədbirdə səslənən məruzə və çıxışlarda bildirilib ki, son iki əsrdə xalqımıza qarşı erməni millətçiləri tərəfindən məqsədyönlü şəkildə etnik təmizləmə, soyqırımı və təcavüzkarlıq siyasəti həyata keçirilib. XVIII əsrin sonları-XIX əsrin əvvəllərində, xüsusilə 1905-1907-ci illərdə Bakıda və digər bölgələrdə dinc azərbaycanlılara qarşı həyata keçirilən qətliamlar ermənilərin çirkin və məkrli niyyətlərini reallaşdırmaq üçün başladıqları soyqırımı siyasətinin ilkin mərhələsi idi. 1915-ci ildən 1920-ci ilədək olan dövrə təsadüf edən ikinci mərhələdə erməni quldur dəstələri yenə də Bakıda və qəzalarda misli görünməyən soyqırımı həyata keçiriblər.
Bildirilib ki, erməni millətçilərinin azərbaycanlılara qarşı soyqırımı və deportasiya siyasəti sonrakı illərdə də davam etdirilib. 1948-1953-cü illərdə və nəhayət, 1988-ci ildə yüz millərlə azərbaycanlı öz doğma torpaqlarından qovulub. Vurğulanıb ki, milli mənsubiyyətinə görə azərbaycanlıların repressiyalara məruz qalmaları və doğma yurdlarından qovulmaları bədnam qonşularımızın “böyük Ermənistan” ssenarisinin tərkib hissəsi olub.
X X X
31 Mart - Azərbaycanlıların Soyqırımı Günü Balakən rayonunda da silsilə tədbirlərlə qeyd edilib.
AZƏRTAC xəbər verir ki, Balakən şəhərində keçirilən ümumrayon tədbirinin iştirakçıları əvvəlcə soyqırımı qurbanlarının xatirəsinə ucaldılan abidə kompleksinin önünə gül dəstələri düzüblər.
Sonra tədbir iştirakçıları rayon Mədəniyyət Mərkəzinin foyesində məktəblilərin soyqırımı hadisələrinə həsr etdikləri rəsmlərdən ibarət sərgiyə baxıblar.
Toplantıda ermənilərin xalqımızın başına gətirdikləri müsibətlərdən, törətdikləri dəhşətli faciələrdən ətraflı bəhs edilib.
Tədbirin sonunda mədəniyyət işçilərinin səhnələşdirdiyi Hüseyn Cavidin “İblis” dramından parçalar nümayiş olunub.
X X X
Azərbaycanlıların Soyqırımı Günü ilə əlaqədar Şəki şəhərindəki 10 nömrəli tam orta məktəbin akt zalında tədbir keçirilib.
Şəhər rəhbərliyi, təhsil işçiləri və ziyalıların iştirak etdiyi tədbirdə çıxış edənlər azərbaycanlılara qarşı soyqırımı siyasətinin iki yüz ildən artıq tarixi olduğunu, bu siyasət nəticəsində yüz minlərlə günahsız soydaşımızın qətlə yetirildiyini diqqətə çatdırıblar. Bildirilib ki, bu təcavüzkar siyasət indi də məqsədyönlü şəkildə davam etdirilir.
Vurğulanıb ki, Prezident İlham Əliyevin torpaqlarımızın azad edilməsi istiqamətində həyata keçirdiyi tədbirlər, soyqırımı siyasətinə beynəlxalq səviyyədə siyasi-hüquqi qiymətin verilməsinə dair apardığı işlər Azərbaycanın haqlı mövqeyinin dəstəklənəcəyinə, ədalətin tezliklə öz yerini tapacağına böyük inam yaradır.
Tədbirin sonunda məktəblilərin hazırladığı ədəbi-bədii kompozisiya nümayiş etdirilib.
X X X
Azərbaycanlıların Soyqırımı Günü ilə əlaqədar Oğuz rayonunun təhsil və mədəniyyət müəssisələrində də silsilə tədbirlər keçirilib, sərgi və guşələr təşkil edilib.
Keçirilən tədbirlərdə soyqırımı siyasətinin məqsədi və mahiyyəti ətraflı təhlil olunub, məkrli qonşularımızın xalqımızın başına gətirdikləri faciələrdən bəhs edilib, həmvətənlərimizin düçar olduqları müsibətlər barədə danışılıb. Erməni millətçilərinin törətdikləri vəhşiliklərin, zorakılıqların xalqımızın yaddaşından heç vaxt silinməyəcəyi vurğulanıb.
Bölmənin digər xəbərləri
