QAN YADDAŞI
Ermənilərin qəsbkarlıq niyyətləri barədə dünya xalqlarına daha ətraflı məlumat çatdırılmalıdır
Bakı, 1 aprel (AZƏRTAC). Azərbaycan Milli Elmlər Akademiyasının Fəlsəfə və Hüquq İnstitutunda 31 mart soyqırımı qurbanlarının xatirəsi anılmışdır.
İnstitutdan AZƏRTAC-a bildirmişlər ki, tədbirdə bu elm müəssisəsinin elmi işlər üzrə direktor müavini, hüquq elmləri doktoru Bəhram Zahidov qəsbkar ermənilərin 1918-ci ilin martında Azərbaycanın ayrı-ayrı şəhər və rayonlarında, o cümlədən Bakı, Şamaxı, Quba, Lənkəran və Göyçayda törətdikləri dəhşətli qırğınlardan bəhs etmişdir.
Müasir fəlsəfə problemləri şöbəsinin aparıcı elmi işçisi, fəlsəfə üzrə fəlsəfə doktoru Mətləb Mahmudov ermənilər tərəfindən azərbaycanlılara qarşı zaman-zaman soyqırımı siyasəti aparıldığını diqqətə çatdırmışdır.
Digər çıxış edən alimlər də məkrli ermənilərin torpaqlarımızda törətdikləri qanlı cinayətlərdən danışmış, düşmənin qəsbkarlıq niyyətləri barədə dünya xalqlarına daha ətraflı məlumat çatdırılmasının vacibliyini vurğulamışlar.