Ermənistanın ədliyyə naziri parlament seçkilərinin nəticələrindən danışıb
Bakı, 30 iyun, AZƏRTAC
Ermənistanın ədliyyə naziri Srbui Qalyan hesab edir ki, siyasi qüvvələrin Konstitusiya Məhkəməsinə təqdim etdiyi faktlar parlament seçkilərinin nəticələrini ləğv etmək üçün əsas vermir.
AZƏRTAC xəbər verir ki, nazir bunu məhkəmə binasının qarşısında jurnalistlərin suallarını cavablandırarkən deyib. “Hər iki tərəfin təqdim etdiyi faktlar seçkilərin etibarsız elan edilməsi üçün heç bir əsas vermir”, - deyə o bildirib.
Srbui Qalyanın sözlərinə görə, o, seçki kampaniyası zamanı geniş yayılmış rüşvətxorluq faktlarına dair iddialarla razıdır, lakin bu, seçki nəticələrini ləğv etmək üçün əsas ola bilməz.
Xatırladaq ki, iyunun 7-də Ermənistanda keçirilən parlament seçkilərində Baş nazir Nikol Paşinyanın hakim “Vətəndaş Müqaviləsi” partiyası 49,7 faiz, biznesmen Samvel Karapetyanın “Güclü Ermənistan” bloku 23,2 faiz, ölkənin sabiq prezidenti Robert Köçəryanın “Ermənistan” bloku isə 9,9 faiz səs toplayıb.
Bölmənin digər xəbərləri
