ƏSİR VƏ İTKİN DÜŞMÜŞ, GİROV GÖTÜRÜLMÜŞ VƏTƏNDAŞLARIMIZLA BAĞLI TƏDBİRLƏR MÜZAKİRƏ OLUNMUŞDUR
Noyabrın 16-da Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının növbəti iclası keçirilmişdir.
Komissiyadan AZƏRTAC-a daxil olmuş məlumatda bildirilir ki, iclasda Ermənistanda və Dağlıq Qarabağ ərazisində əsir və girov saxlanılmış Azərbaycan vətəndaşlarına qarşı ermənilərin törətdikləri cinayətlərə hüquqi qiymət verilməsi, Ermənistanın beynəlxalq hüquq normalarını kobud surətdə pozması faktlarının dünya ictimaiyyətinə çatdırılması ilə bağlı tədbirlər müzakirə edilmişdir.
Dövlət Komissiyasının üzvləri və dəvət olunmuş ekspertlər Azərbaycan xalqına qarşı cinayətlər törətmiş erməni mənşəli şəxslərin məsuliyətə cəlb olunmasının vacibliyini vurğulamış, bunun üçün müvafiq təkliflər irəli sürmüşlər.
İclasda bildirilmişdir ki, Azərbaycan Prezidenti Heydər Əliyevin məqsədyönlü siyasəti ermənilərin uzun illər ərzində uydurduqları “əzabkeş erməni xalqı” imicinə ciddi zərbə vurmuş, Ermənistanın təcavüskar dövlət kimi tanıdılması istiqamətində xeyli iş görülmüşdür. Bu baxımdan, əsir və girovlara qarşı törədilmiş vəhşiliklər barədə faktları toplayıb sistemləşdirmək və dünya ictimaiyyətinə çatdırmaq üçün Dövlət Komissiyasının həyata keçirdiyi tədbirlərin də böyük əhəmiyyəti var. Xalqımıza qarşı cinayətlər törətmiş erməni mənşəli şəxslərin əməllərinə mütləq Azərbaycan Respublikasının qanunları və beynəlxalq normalar çərçivəsində hüquqi qiymət verilməli, bu məqsədlə nəzərdə tutulmuş tədbirlərin reallaşdırılması sürətləndirilməlidir.
Bölmənin digər xəbərləri
