SİYASƏT
Estoniyanın Ticarət və Sənaye Palatasında Azərbaycanın təqdimatı keçirilib
Bakı, 14 dekabr, AZƏRTAC
Estoniya Ticarət və Sənaye Palatası ilə Azərbaycanın Estoniyadakı səfirliyinin birgə təşkilatçılığı ilə ölkəmizin iqtisadi uğurları, əlverişli investisiya imkanları barədə geniş təqdimat keçirilib.
Ölkəmizin Estoniyadakı səfirliyindən AZƏRTAC-a bildiriblər ki, təqdimata qatılan Estoniyanın qabaqcıl şirkətlərinin nümayəndələri oktyabrın 18-də “Caspian Energy Club” və Latviya Ticarət və Sənaye Palatasının (LCCI) birgə təşkilatçılığı ilə Bakıda keçirilmiş “LEF Network Azerbaijan” (Latviya, Estoniya, Finlandiya) layihəsi çərçivəsində “B2B Education Forum”unda iştirak ediblər.
Estoniyanın Ticarət və Sənaye Palatasının Baş katibi Mait Palts tədbir zamanı müzakirə olunacaq məsələlərin, sahələr üzrə fikir mübadiləsi aparılacaq mövzuların eston şirkətlərinin ölkəmizdə daha geniş şəkildə təmsil olunmalarına əlavə təkan verəcəyini bildirib, bu baxımdan səfirliklə yaxından əməkdaşlıq etməyə hazır olduqlarını vurğulayıb.
O, “LEF Network Azerbaijan” layihəsində rəhbərlik etdiyi Palatanın Finlandiya və Latviyadan olan həmkarları ilə birlikdə məmnunluqla iştirak etdiyini, həmin layihənin əsas məqsədinin öz şirkətlərinin ölkəmizdəki biznes tərəfdaşları ilə qarşılıqlı faydalı əməkdaşlığının qurulmasını təşviq etməkdən ibarət olduğunu diqqətə çatdırıb.
Azərbaycanın Estoniyadakı səfiri Anar Məhərrəmov ölkəmizdə iqtisadiyyatın ardıcıl yüksəlişi, sərmayə qoyuluşu üçün münbit şəraitin yaradıldığını vurğulayaraq, kiçik və orta biznesin inkişafı istiqamətində son illərdə həyata keçirilən tədbirlərdən geniş bəhs edib.
Bildirilib ki, qeyri-neft sektorunun davamlı inkişafının təmin edilməsi, sahibkarlıq fəaliyyətinin genişləndirilməsi, məşğulluq səviyyəsinin artırılması ölkəmizdə həyata keçirilən iqtisadi siyasətin əsas prioritetlərindəndir.
Əsas məqsədin qabaqcıl idarəetmə təcrübəsinə uyğun yüksək əlavə dəyərli və ixracyönümlü istehsalı təmin etmək olduğu vurğulanıb. Bildirilib ki, innovativ texnologiyalardan istifadə edərək xidmətlər göstərən investorları cəlb etmək, bu şirkətlərin Azərbaycan şirkətləri ilə əməkdaşlığı nəticəsində ölkə iqtisadiyyatının dinamik və dayanıqlı inkişafına töhfə vermək, həmçinin on minlərlə yeni iş yeri yaratmaq da əsas hədəflərdəndir.
Görüşdə işğaldan azad olunmuş ərazilərimizdə və sənaye parklarında yaradılan investisiya imkanları barədə geniş məlumat verilib. İqtisadiyyatın inkişafına, ixrac potensialının artırılmasına, rəqabətqabiliyyətli məhsul istehsalına önəmli töhfə verən Sumqayıt Kimya, Pirallahı, Mingəçevir, Qaradağ, Balaxanı sənaye parkları ilə yanaşı, “Ağdam Sənaye Parkı” və “Araz Vadisi İqtisadi Zonası” Sənaye Parkının da fəaliyyət göstərdiyi qeyd olunub.
Azərbaycanda iqtisadiyyatın müxtəlif sahələrinin şaxələndirilməsi, xarici investisiyanın cəlb edilməsi, biznes və investisiya mühitinin daha da yaxşılaşdırılması istiqamətində çox vacib layihələrin icra olunduğu, “ASAN xidmət”, DOST mərkəzləri, E-Rezidentlik (elektron Rezidentlik) və m-Rezidentlik (mobil Rezidentlik) dövlət proqramı, həmçinin ölkəmizin vergi sistemində aparılan islahatlar haqqında məlumat verilib.
Estoniyanın qabaqcıl şirkətlərinin nümayəndələri ölkəmizə sərmayə qoyulmasında fəal iştiraka dəvət olunublar.
Sonda biznes nümayəndələrinin təklif və rəyləri dinlənilib, onları maraqlandıran suallar ətraflı cavablandırılıb.