“Ətraf mühit təhlükəsizliyi və ətraf mühit idarəçiliyi planı” üzrə təlim kirsuna başlanılmışdır
Bakı, 27 oktyabr (AZƏRTAC). Azərbaycan hökuməti ilə Beynəlxalq İnkişaf Assosiasiyası arasında imzalanmış sazişə əsasən “Dövlət investisiyaları üzrə kadr potensialının gücləndirilməsi” layihəsi həyata keçirilir. Layihə çərçivəsində 6 günlük təlim kursuna başlanılmışdır.
Layihənin ictimaiyyətlə əlaqələr üzrə məsləhətçisi Elçin Sərdarov AZƏRTAC-a demişdir ki, təlimin əsas məqsədi iştirakçılara “Ətraf mühit təhlükəsizliyi və ətraf mühit idarəçiliyi planı” mövzusunda ətraflı məlumatlar verməkdir.
Təlimdə qanunvericilik, ətraf mühitə təsirin qiymətləndirilməsi, idarəçilik planı üzrə monitorinq və s. kimi mövzularla bağlı nəzəri və praktiki məşğələlər aparılacaqdır. Eyni zamanda, təlim iştirakçıları tikilən və həssas ərazilərə baxış keçirəcək və nəticələri müzakirə edəcəklər.
Azərbaycan Ornitoloji Cəmiyyətinin beynəlxalq ekspertləri Umberto Gallao Orsi, Nesimi Ozan Veryeri və yerli ekspertlər Sevinc Saruxanova, Sevinc Hümbətova və Elçin Sultanov tərəfindən aparılan təlim kursu Təhsil Nazirliyinin təlim mərkəzində keçirilir.
Azərbaycan dilində olan təlimdə dövlət investisiya üzrə qurum və təşkilatların mütəxəssisləri iştirak edirlər. Sonda keçiriləcək test imtahanını uğurla başa vuran təlim iştirakçılarına müvəffəqiyyət sertifikatı veriləcəkdir.
Bölmənin digər xəbərləri
