Fatma Yıldırım: Azərbaycan yeni dövrün çağırışlarına uyğun qətiyyətli islahatlar həyata keçirir
Bakı, 9 mart, AZƏRTAC
Prezident İlham Əliyevin rəhbərliyi ilə həyata keçirilən dərin islahatlar kursu demokratik dəyərlərin təşviqini, o cümlədən parlamentarizm ənənələrinin möhkəmlənməsini təmin edib. Xüsusən 2020-ci ilin fevral ayında keçirilmiş parlament seçkilərindən sonra formalaşan qanunverici orqanda aparılan islahatlar yeni siyasi konfiqurasiyanın yaranması baxımından mühüm əhəmiyyətə malikdir. Dövlətimizin başçısı 2020-ci il martın 10-da VI çağırış Azərbaycan Respublikasının Milli Məclisinin ilk iclasında çıxış edərək ölkəmizdə mövcud olan siyasi mühit, siyasi münasibətlərin inkişafı, qanunvericilik işi sahəsində qarşıda duran vəzifələrlə bağlı fikirlərini ifadə etdi, Milli Məclisin gələcək fəaliyyətinin hədəf və prioritetlərini özündə ehtiva edən yol xəritəsini müəyyənləşdirdi.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
Deputat bildirib ki, Prezident İlham Əliyevin rəhbərliyi ilə həyata keçirilən çoxşaxəli islahatlar siyasi sistemdə keyfiyyətcə yeni, konstruktiv dialoq və əməkdaşlıq mərhələsinin başlanmasını şərtləndirib. Milli həmrəyliyə və sağlam siyasi münasibətlərə xidmət edən bu dialoq Azərbaycanda demokratiyanın inkişafında, siyasi, iqtisadi azadlıqların qorunmasında, ölkəmizin güclənməsində mühüm rola malikdir.
Sistemli və kompleks islahatların həyata keçirilməsində hüquqi bazanın möhkəmləndirilməsinin və təkmilləşdirilməsinin böyük əhəmiyyət kəsb etdiyini diqqətə çatdıran F.Yıldırım vurğulayıb: “Dövlətimizin başçısının da bəyan etdiyi kimi, Milli Məclis ölkəmizin uğurlu inkişafı istiqamətində böyük rol oynayır. Azərbaycan yeni dövrün çağırışlarına uyğun qətiyyətli islahatlar həyata keçirir, idarəetmə sistemi təkmilləşdirilir, əsaslı institusional dəyişikliklər baş verir və bu kompleks keyfiyyət dəyişiklikləri Milli Məclis qarşısında mühüm vəzifələr qoyur. Milli Məclis öz fəaliyyətini məhz bu çağırışlar əsasında qurub”.
Deputatın sözlərinə görə, Milli Məclisin sədri vəzifəsinə zərif cinsin nümayəndəsinin seçilməsi ölkəmizdə qadınların demokratik dəyərlərin təşviqi prosesinə cəlb edilməsi baxımından olduqca önəmli hadisədir. Bu seçkilər fonunda həyata keçirilən islahatların ən mühüm nəticələrindən biri qadın və gənc deputatların sayının artması, onların qanunvericilik işində iştirakına yeni imkanların yaradılmasıdır.
F.Yıldırım qeyd edib ki, Prezident İlham Əliyevin rəhbərliyi ilə aparılan demokratik islahatlar çərçivəsində start verilmiş siyasi dialoq prosesinin təkmilləşdirilməsi, bu istiqamətdə münasibətlərin sağlam zəmində qurulması və inkişafı baxımından çox əhəmiyyətlidir: “Artıq ölkəmizdə yeni siyasi konfiqurasiya formalaşıb. Bu gün ən müxtəlif mövzular ətrafında siyasi partiyalarla açıq, şəffaf, fikir plüralizmi şəraitində müzakirələr aparılır. Bu amil son dərəcədə əhəmiyyətlidir, siyasi islahatların və əməkdaşlığın tərkib hissəsidir. Siyasi dialoqun önəmini biz Vətən müharibəsi zamanı da aydın şəkildə gördük. Bunun nəticəsidir ki, 44 günlük Vətən müharibəsində iqtidarı, müxalifəti təmsil etməsindən asılı olmayaraq, 50 siyasi partiya birgə bəyanat imzalayaraq Ali Baş Komandanla, ordumuzla birlik nümayiş etdirdi. Məhz bu birlik sayəsində yaranmış vahid mövqe möhtəşəm Qələbəmizi şərtləndirən amillərdən biri oldu. Bütün bunlar göstərir ki, ümummilli məsələlərdə vahid mövqedən çıxış etmək bizi cəmiyyət olaraq bundan sonra da daim irəli aparacaq”.
VI çağırış Milli Məclisin ötən iki il ərzində kifayət qədər məhsuldar və səmərəli fəaliyyət göstərdiyini diqqətə çatdıran F.Yıldırım bildirib ki, parlamentin qanunvericilik təşəbbüsləri artıb. Bununla yanaşı, parlamentdə qadınların və gənclərin geniş təmsil olunması demokratik inkişafın mühüm göstəricisi kimi qanunvericilik fəaliyyətinə də öz töhfələrini verməkdədir: “VI çağırış Milli Məclis çətin dövrdə fəaliyyətə başladı. Koronavirus pandemiyasının tüğyan etdiyi bir dövrdə müəyyən çətinliklər qarşıya çıxdı. Lakin Milli Məclis işini planlı şəkildə quraraq səmərəli fəaliyyətini davam etdirdi. Bu müddət ərzində ölkəmizin sosial-iqtisadi, siyasi inkişafı ilə bağlı bir çox qanunlar qəbul olunub, ictimai dinləmələr təşkil edilib. Faydalı müzakirələr şəraitində dövlətimizin və xalqımızın maraqlarına, mənafeyinə və rifahına xidmət edən mühüm dövlət sənədlərinə, məcəllə və hüquqi aktlara müvafiq dəyişikliklər edilib”.
VI çağırış Milli Məclisin fəaliyyətinin bir hissəsi Vətən müharibəsi dövrünə təsadüf etdiyini bildirən F.Yıldırım deyib: “Çətin anlar yaşasaq da, qürurluyuq ki, bu tarixi hadisələrə şahidlik etdik. Azərbaycan Zəfər qazanaraq öz ərazi bütövlüyünü təmin etdi. Milli Məclisin sessiyaları çərçivəsində deputatların xaricdəki həmkarları ilə videokonfrans formatında bir sıra görüşlər keçirməsi, müxtəlif məsələlərlə bağlı məhsuldar danışıqlar aparması parlamentimizin diplomatik uğurlarda mühüm rol oynadığını təsdiqləyir. Vətən müharibəsi dövründə deputatlarımız öz fəaliyyətlərini daha da gücləndirərək, parlament rəhbərliyi səviyyəsində, eləcə də dostluq qruplarının rəhbərləri və beynəlxalq təşkilatlar səviyyəsində gərgin çalışdılar. Mən də öz növbəmdə Səudiyyə Ərəbistanı Krallığı ilə Dostluq Qrupunun sədri və GUAM Parlament Assambleyasında Azərbaycan nümayəndə heyətinin üzvü kimi hər zaman öz mövqeyimi bildirmişəm. Məqsədimiz Azərbaycanın haqq səsinin, ədalətli mövqeyinin dünyaya çatdırılması olub”.
Milli Məclisin adından Ermənistanın terrorçu mahiyyətini ifşa edilməsi məqsədilə dünya ölkələrinin parlamentlərinə çoxsaylı müraciətlər ünvanlandığını diqqətə çatdıran F.Yıldırım deyib: “Düşünürəm ki, Azərbaycan Milli Məclisi bu işin öhdəsindən də layiqincə gələ bildi. Seçiciləri ilə sıx təmasda olan deputatlarımız şəhid ailələrinin və qazilərin problemlərinə xüsusi diqqət ayırırlar. Deputatlar həssas qrupdan olan insanları narahat edən məsələlər araşdırır və aidiyyəti orqanların nəzərinə çatdırırlar. Biz birlikdə güclüyük!”.
Bölmənin digər xəbərləri
