Fikrət Axundov: Azərbaycanla Niderland arasında münasibətlər müsbət istiqamətdə inkişaf edir
Paris, 5 aprel, AZƏRTAC
“Diplomatmagazine.eu” portalında Azərbaycanın Niderlanddakı səfiri Fikrət Axundovun “Azərbaycan və Niderland diplomatik münasibətlərinin 30 illiyini qeyd edir” adlı məqaləsi dərc olunub.
AZƏRTAC xəbər verir ki, məqalədə cari ilin Azərbaycan və Niderland arasında ikitərəfli münasibətlərin mühüm mərhələsi olduğu qeyd edilib. Bildirilib ki, Niderland Krallığı Azərbaycanın müstəqilliyini 1991-ci il dekabrın 31-də tanıyıb və 1992-ci il aprelin 1-də diplomatik əlaqələr qurulub. Azərbaycan 2007-ci ildə Haaqada, Niderland isə 2009-cu ildə Bakıda səfirliyini açıb.
Məqalədə son 30 ildə iki ölkə arasında əlaqələrin inkişafından söz açılıb. Bildirilib ki, ikitərəfli əlaqələr kənd təsərrüfatı, logistika, təhsil, turizm, mədəniyyət və müxtəlif sahələrdə inkişaf trayektoriyasına malik olub. 2015-ci ildə Azərbaycanın iqtisadiyyat nazirinin rəhbərlik etdiyi nümayəndə heyətinin səfəri çərçivəsində Niderland-Azərbaycan Biznes Forumu Niderlandda keçirilib. Bu gün Azərbaycanda müxtəlif sahələrdə 50 Hollandiya şirkəti çalışır.
Azərbaycan Respublikası ilə Niderland Krallığı arasında iqtisadi əməkdaşlığı genişləndirmək məqsədilə 2016-cı ildə Bakıda “Azərbaycan Hollandiya Biznes Mərkəzi” rəsmi olaraq fəaliyyətə başlayıb. Azərbaycanın əsas ixrac məhsulları - neft məhsulları, üzvi kimyəvi maddələr, meyvələr, o cümlədən quru meyvələr və şərabdır. Bu baxımdan yerli Hollandiya şirkətləri azərbaycanlı tərəfdaşları ilə sıx əməkdaşlıq edir və Azərbaycan şərabları və meyvələri Hollandiyada keçirilən müxtəlif sərgilərdə nümayiş olunur.
Niderlandın “La feve” şokolad şirkəti öz şokolad məhsulları üçün Azərbaycan quru meyvələrindən istifadə edir. Niderland şirkətləri Azərbaycanda hər il keçirilən müxtəlif sərgilərdə, xüsusən də Kənd Təsərrüfatı üzrə ixtisaslaşmış “Caspian Agro” sərgisində iştirak edirlər.
Azərbaycan öz iqtisadiyyatının inkişafı və şaxələndirilməsində maraqlıdır və Niderlandın bu məsələdə köməklik göstərəcək təcrübə və alətləri var. Azərbaycan kənd təsərrüfatında, o cümlədən su təsərrüfatında hollandiyalı mütəxəssislərin ekspertiza və təcrübəsindən geniş istifadə edib. Ekoloji və “yaşıl enerji” məsələləri də əməkdaşlığın əsas aspektlərindən biridir. Belə ki, Azərbaycan Prezidenti İlham Əliyevin 2016-cı il Sərəncamı ilə qeyri-neft sektorunun prioritetləri və yol xəritəsi müəyyən edilib. Bu sahələr ikitərəfli iqtisadi əlaqələr üçün cəlbedici olub. Niderland şirkətləri Bakıda, Cənubi Qafqazın ən böyük dəniz limanı olan Bakı Beynəlxalq Dəniz Ticarət Limanında (Bakı Limanı) logistika sahəsində fəaliyyət göstərir. COVID-19 pandemiyasının ən ağır dövründə belə iki ölkə arasında xarici ticarət 104 milyon dollara çatıb. Bu da Azərbaycan ilə Niderland arasında marağın və əməkdaşlığın yüksək səviyyədə olmasını əks etdirir. Həmçinin ölkələrdəki sosial-iqtisadi və siyasi sabitlik gələcək davamlı iqtisadi artım üçün dostluq mühiti yaradır.
Səfir məqalədə qeyd edib ki, iqtisadi əlaqələr həmişə dövlətlər arasında ikitərəfli münasibətlərin əsas elementi olsa da, xalqlar arasında münasibətlər daha vacib və uzunmüddətlidir. Bu baxımdan Oesterveyk şəhərinin holland qardaş və bacıları ilə çiyin-çiyinə Niderlandın azadlığı uğrunda döyüşmüş bir qəhrəmanı var və şəhər bu gün də Azərbaycandan olan bu Milli Qəhrəmanı yad edir.
İkinci Dünya müharibəsi illərində partizan hərəkatının üzvü olmuş və sonralar Hollandiyada qalmış Məmməd Məmmədov (“Medo” ləqəbli) Oesterveyk sakinlərinin ürəyində daim yaşayır. Medonun vətəni Zaqatala şəhəri ilə Medo şəhəri arasında körpü qurulub. İki şəhər qardaşlaşmış şəhərlər çərçivəsində əməkdaşlıq edir və Oesterveyk sakinləri hər il Azərbaycanın və Hollandiyanın bu ümumi qəhrəmanının xatirəsini yad edirlər.
Səfir F.Axundov iki ölkə arasında mövcud təhsil proqramlarından söz açıb. Bildirib ki, Bakı ADA Universiteti və Maastrixt İdarəetmə Məktəbi qarşılıqlı magistr proqramı həyata keçirirlər və bu proqram vasitəsilə azərbaycanlı tələbələr Niderlandda təhsil almaq və təhsil təcrübəsi əldə etmək şansı əldə edirlər. Proqram məzunları həm ADA, həm də MSM diplomlarına yiyələnirlər. Avropanın ən böyük Azərbaycan diasporlarından birinə malik olan Niderland azərbaycanlıları yerli cəmiyyətə tam inteqrasiya edərək, hər iki ölkəni qürurla təmsil edirlər. Bakıda Rotterdam, Rotterdamda isə Bakı küçəsi var. Avropada ilk dəfə olaraq Haaqada müasir Azərbaycan tarixinin faciəli səhifələrindən birinə həsr olunmuş Xocalı soyqırımı qurbanlarının xatirəsinə abidə ucaldılıb.
“Azərbaycan Niderlandı həm ikitərəfli, həm də çoxtərəfli sahədə müttəfiq və etibarlı tərəfdaş hesab edir. Son otuz ildə Niderland ilə Azərbaycan arasında münasibətlər müsbət istiqamətdə inkişaf edir. Münasibətlər dövlətlərin ərazi bütövlüyünə və suverenliyinə qarşılıqlı hörmət üzərində qurulub və böyük əminliklə qeyd etmək olar ki, bu prinsiplər əsasında daha da inkişaf edəcək, Niderland və Azərbaycan xalqlarını və dövlətlərini daha da yaxınlaşdıracaq”, -deyə səfir vurğulayıb.
Şəhla Ağalarova
AZƏRTAC-ın xüsusi müxbiri
Haaqa
Bölmənin digər xəbərləri
