FİLARMONİYA YENİ KONSERT MÖVSÜMÜNƏ HAZIRLAŞIR
Filarmoniyadan AZƏRTAC-ın müxbirinə bildirmişlər ki, bir ənənə olaraq hər il sentyabr ayının 18-də ölməz bəstəkarımız, Azərbaycan musiqisinin korifeyi Üzeyir Hacıbəyovun doğum günü münasibətilə müxtəlif təntənəli tədbirlər həyata keçirilir. Məhz həmin gün filarmoniyada yeni konsert mövsümünün açılışı Üzeyir Hacıbəyovun xatirəsinə həsr olunacaq və bu məqsədlə dünya miqyaslı violonçel ustası Mstislav Rostropoviçin iştirakı ilə konsert keçiriləcək. Bu konsertdə maestro Ü.Hacıbəyov adına Azərbaycan Dövlət Simfonik Orkestri ilə çıxış edəcək, Qərbi Avropa, rus və Azərbaycan bəstəkarlarının əsərləri ifa olunacaq.
Yeni mövsümdə filarmoniyanın nəzdində fəaliyyət göstərən kollektivlərin konsertləri keçiriləcək.
Filarmoniya öz ənənəsinə sadiq qalaraq ilboyu məşhur sənətkarları vətənimizə dəvət edəcək. Bu sənətkarlardan pianoçu Aleksey Volodin, Aleksandr Melnikov (Rusiya), Yevgeni Mogilevski (Belçika), Yossi Reşef (İsrail), skripkaçı və dirijor Dmitri Sitkovetski (İngiltərə), görkəmli dirijor Korneliya Kersenbrok (Avstriya), G.Çiçinadze (Gürcüstan), Dmitri Xoxlov (Rusiya), vokal ustası Yelena Obraztsova-Makarova (İspaniya) və digər ifaçıların çıxışları gözlənilir.
Filarmoniyada Azərbaycanın görkəmli incəsənət xadimləri, akademik musiqi sənəti ustadları, məşhur muğam ustaları və estrada ulduzlarının iştirakı ilə konsertlərə də geniş yer veriləcəkdir.
Bölmənin digər xəbərləri
