Forum iştirakçıları Naxçıvanın mədəniyyət, səhiyyə müəssisələri ilə tanış olublar
Naxçıvan, 18 oktyabr, AZƏRTAC
“Mühasiblərin və Auditorların VII Avrasiya Forumu”nun iştirakçıları Naxçıvanın tarixi abidələri, mədəniyyət, səhiyyə müəssisələri, gəzməli-görməli yerləri ilə tanış olublar.
AZƏRTAC-ın Naxçıvan bürosu xəbər verir ki, qonaqlar əvvəlcə ümummilli liderimiz Heydər Əliyevin Naxçıvan şəhərindəki abidəsi önünə gül dəstəsi qoyub, dahi şəxsiyyətə ehtiramlarını bildiriblər. Daha sonra forum iştirakçıları Heydər Əliyev Muzeyini ziyarət ediblər.
Mədəniyyət ocağı ilə tanışlıq zamanı qeyd olunub ki, bu gün muzeyin fondunda ulu öndər Heydər Əliyevin həyat və fəaliyyətini əks etdirən 5 mindən çox eksponat toplanıb. Muzey Naxçıvan Muxtar Respublikası Ali Məclisi Sədrinin 1999-cu il fevralın 18-də imzaladığı Sərəncam əsasında yaradılıb və 1999-cu il mayın 10-da fəaliyyətə başlayıb. Muzeydə ümummilli lider Heydər Əliyevin uşaqlıq və gənclik illərinə həsr olunmuş stendlər, onun Naxçıvan Muxtar Respublikası Ali Məclisinin Sədri işlədiyi dövrə aid (1991-1993) şəxsi sənəd və materiallar, imzaladığı sərəncamlar, qərarlar, Türkiyə Cümhuriyyəti və İran İslam Respublikası ilə əməkdaşlıq sahəsində imzaladığı müqavilələrin surətləri, həmin illərdə Azərbaycan Respublikasının müxtəlif bölgələrində yaşayan vətəndaşların müraciətləri toplanıb. Muzeyin kitabxanasında Ulu Öndərin həyat və fəaliyyətini əks etdirən jurnal, albom və kitablar saxlanılır.
Duzdağ Fizioterapiya Mərkəzinə gələn qonaqlara məlumat verilib ki, mərkəz 1979-cu il dekabrın 29-dan 50 çarpayılıq xəstəxana kimi Naxçıvan duz mədəni bazasında, dəniz səviyyəsindən 1173 metr hündürlükdə fəaliyyət göstərir. 2003-cü ildə xəstəxananın yeraltı şöbəsində ən müasir tələblərə uyğun olaraq yenidənqurma işləri aparılıb, yeraltı şöbə genişləndirilib, müasir avadanlıqlarla və ləvazimatlarla təmin edilib. Duzdağ Fizioterapiya Mərkəzinin digər duz şaxtalarından üstünlüyü ondadır ki, şaxta horizontal yerləşdiyindən xəstələr yeraltı şöbəyə tez adaptasiya olunurlar. Dağın altına doğru 300 metr uzanan mərkəzdə yüksək səviyyəli xidmət şəraiti yaradılıb. Son illərdə ölkəmizin müxtəlif regionlarından, habelə dünyanın bir çox yerlərindən bronxial-astma xəstələri buraya gələrək müalicə alırlar.
Səfər çərçivəsində forum iştirakçıları “Naxçıvanqala” Tarix-Memarlıq Muzey Kompleksində keçirilən “Arıçılıq məhsulları-bal satış yarmarkası”nda da iştirak ediblər. Muxtar respublikanın bölgələrində istehsal olunan məhsullar qonaqların böyük marağına səbəb olub. “Xan Sarayı” Dövlət Tarix-Memarlıq, Möminə Xatun və Açıq Səma Altında, “Naxçıvanqala” Tarix-Memarlıq Muzey, “Əshabi-Kəhf Ziyarətgahı” Dini-Mədəni Abidə kompleksləri, Batabat yaylağı, Ağbulaq İstirahət Mərkəzi ilə tanışlıq forum iştirakçılarında muxtar respublikamızın tarixi, mədəniyyəti, turizm potensialı barədə zəngin təəssürat yaradıb.
“Mühasiblərin və Auditorların VII Avrasiya Forumu” çərçivəsində beynəlxalq mühasib təşkilatları ilə Naxçıvan Muxtar Respublikası Maliyyə Nazirliyi yanında Maliyyə Tədris Mərkəzi arasında qarşılıqlı əməkdaşlığa dair memorandum imzalanıb.
Bölmənin digər xəbərləri
