FÖVQƏLADƏ HALLAR NAZİRLİYİNDƏ FRANSA SƏFİRİ İLƏ GÖRÜŞ OLMUŞDUR
Əsası ümummilli lider Heydər Əliyev tərəfindən qoyulmuş Azərbaycan-Fransa əlaqələrinin uğurla inkişaf etdiyini diqqətə çatdıran fövqəladə hallar naziri Kəmaləddin Heydərov, səmərəli əməkdaşlığın bir çox sahələrdə daha da dərinləşdiyini vurğulamışdır. Azərbaycan Prezidenti İlham Əliyevin Fransaya səfərlərinin ölkələrimiz arasında əlaqələrin inkişafında yeni mərhələ açdığını söyləyən Kəmaləddin Heydərov, qarşılıqlı əməkdaşlığın dərinləşməsində səfirlərin də üzərinə böyük vəzifələr düşdüyünü bildirmişdir.
Səfir Bernar Amodrik dü Şafo Fransanın Azərbaycan ilə hərtərəfli əməkdaşlığa xüsusi önəm verdiyini söyləyərək, ölkəmizin dinamik inkişafını, həyata keçirilən islahatları yüksək qiymətləndirmişdir. Fransalı diplomat Azərbaycanda səfir kimi üç aya yaxın müddətdə fəaliyyət göstərdiyini bildirərək, ölkələrimiz arasındakı münasibətlərin yüksələn xətlə inkişafından məmnun qaldığını söyləmişdir. Diplomat, bu günlərdə Parisdə keçiriləcək NATO Parlament Assambleyasının yaz sessiyasında Azərbaycan Prezidenti İlham Əliyevin iştirakını, səfər çərçivəsində görüşlərinin ölkələrimiz arasında əlaqələrin inkişafını daha da sürətləndirəcəyini xüsusi vurğulamışdır.
Fransalı diplomat yeni vəzifədə Kəmaləddin Heydərova uğurlar arzulamış, dövlətin vacib qurumu kimi Fövqəladə Hallar Nazirliyinin fəaliyyət istiqamətləri, funksiyaları ilə maraqlanmışdır.
Fövqəladə hallar naziri Kəmaləddin Heydərov, ölkəmizə yeni təyin olunmuş fransalı səfirə fəaliyyətində uğurlar arzulamış və ümidvar olduğunu bildirmişdir ki, onun məqsədyönlü səyləri nəticəsində ölkələrimiz və xalqlarımız arasında əlaqələr daha da genişlənəcəkdir.
Azərbaycan Prezidenti İlham Əliyevin müvafiq Sərəncamı ilə yaradılan nazirliyin müasir dövrün tələblərinə uyğun formalaşması istiqamətində görülən işlər barədə qonağa ətraflı məlumat verən nazir, respublikamızda iqtisadi inkişaf, həyata keçirilən nəhəng neft və qaz layihələri, aqrar-sənaye və tikinti sektorunda baş verən irəliləyişlərin Fövqəladə Hallar Nazirliyinin də qarşısında yeni vəzifələr qoyduğunu diqqətə çatdırmışdır. Nazir, insanların təhlükəsizliyinin təminatında, fövqəladə halların qarşısının vaxtında alınması, nəticələrinin aradan qaldırılması, qabaqlayıcı tədbirlərin görülməsində beynəlxalq təcrübənin tətbiqinə ciddi fikir verildiyini qonağın diqqətinə çatdırmışdır.
Görüşdə qarşılıqlı maraq doğuran məsələlər ətrafında geniş fikir mübadiləsi aparılmışdır.
Bölmənin digər xəbərləri
