Fransa Baş naziri təcridolma rejiminin yenidən tətbiqini istisna etmir
Paris, 15 yanvar, AZƏRTAC
Epidemiya vəziyyəti sərtləşərsə, təcridolma rejiminin yenidən tətbiqi istisna deyil.
AZƏRTAC xəbər verir ki, bu fikirləri Fransa Baş naziri Jan Kasteks ölkədə koronavirus epidemiyası ilə bağlı mətbuat konfransında deyib.
Baş nazir bildirib ki, Yeni il bayramından sonra epidemik vəziyyət gözlənildiyi dərəcədə sərtləşməsə də, sanitar vəziyyət kövrək olaraq qalır. Virusun yayılması sərtləşdiyi təqdirdə yeni sərt qadağaların tətbiq olunmasının istisna olmadığını diqqətə çatdırıb. Xəstəxanalarda vəziyyətin ağır stabil olduğunu deyib.
Baş nazir virusun yeni variantlarının ölkədə fəal yayıldığını bildirərək, onun yayılmasının qarşısını almaq üçün bütün qaydaların tətbiqinin məcburi olduğunu vurğulayıb. Ölkədə milli səviyyədə komendant saatının yerli vaxtla axşam saat 18:00-dan səhər saat 06:00-dək davam edəcəyini qeyd edib.
Məktəblərdə sanitar qaydalara riayət edilməsinə xüsusi diqqət göstəriləcəyi bildirilib. Liseylərdə hibrid dərslərə - şagirdlərin 50 faizinin fiziki iştirakı, 50 faizinin isə virtual iştirakına üstünlük veriləcək.
Ölkədə koronavirus əleyhinə peyvənd kampaniyasının sürətləndirilməsinin vacibliyinə toxunularaq, 700-dən çox peyvəndetmə mərkəzinin açılacağı söylənilib.
Xatırladaq ki, Fransada koronavirusdan 69 mindən çox insan həyatını itirib. Son həftələr gündəlik yoluxma halı 20 min civarındadır.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
