Fransa dünya xalqlarına qarşı məkrli siyasət yürüdür - RƏY
Bakı, 24 oktyabr, AZƏRTAC
Əsrlər boyu müstəmləkəçilik siyasəti yürüdən, 50-dən çox ölkənin ərazisini uzun illər işğal altında saxlayıb var-dövlətini talayan və milyonlarla insanı qətlə yetirən Fransanın bu gün demokratiyadan, insan haqlarından, beynəlxalq normalardan danışmağa haqqı yoxdur. Fransızların törətdikləri soyqırımları və müharibə cinayətləri tarixin səhifəsində qara, unudulmaz ləkədir və bu neokolonist siyasət bəşəriyyətin gələcəyi üçün bir faciədir. Yüz illər boyunca bu vəhşi, qorxunc, militarist siyasət 10 milyondan çox dinc insanın qətlinə, şikəst olmasına, əzablar içərisində yaşamasına səbəb olub. Əlcəzairdə, Polineziyada, Korsikada, Melaneziyada törədilmiş faciələr, Afrika, Cənub Şərqi Asiya, Sakit Okean, Latın Amerikasında onlarla ölkənin işğal edilməsi və xalqlarına əzab verilməsi, çoxsaylı cinayətlərin həyata keçirilməsi, etnik və dini mənsubiyyətlərinə görə yüz minlərlə insanın soyqırımına məruz qalması, şəhər və kəndlərin xarabazarlığa çevrilməsi Fransanın dövlət siyasətinin əsası olub. Təəssüfləndirici haldır ki, bu gün də dünyanın bir çox dövlətləri, ümumiyyətlə, bəşəriyyət bu məkrli, çirkin siyasətlə üz-üzədir.
Bu sözləri AZƏRTAC-a açıqlamasında Milli Məclisin Aqrar siyasət komitəsinin sədri Tahir Rzayev söyləyib.
“Bakı Təşəbbüs Qrupunun təşkilatçılığı ilə Fransanın müstəmləkə altında saxladığı ölkələrin, eləcə də Korsika təmsilçilərinin iştirak etdikləri “Neokolonializm: İnsan Hüquqlarının Pozulması və Ədalətsizlik” mövzusunda beynəlxalq konfransda səsləndirilən fikirlər, əsarətə düçar olan insanların söylədikləri faktlar rəsmi Parisin törətdiyi cinayətlərin nümunələridir. Əsrlərlə yürüdülən bu mənfur siyasət bu gün də davam etdirilməkdədir. Konfransda da qeyd olunduğu kimi, Fransa neokolonializminin yeni metodları bu gün də milyonlarla insanın qəsdinə, ölkələrin talan edilməsinə, yeni münaqişə ocaqlarının, müharibələrin alovlanmasına yönəldilib. Prezident İlham Əliyevin konfrans iştirakçılarına ünvanlandığı müraciətində bir daha xatırladılır ki, bəşəriyyətin kolonializm tarixinin qanlı cinayətlərinin çoxu məhz Fransa tərəfindən törədilib. Dünyada ədalətin bərpa olunması, beynəlxalq normalara hörmət, demokratiyanın təntənəsi şüarlarını əlində bayraq edən Fransa, əslində, bəşəriyyətin və dövlətlərin düşməni rolunda çıxış edir. Etnik və dini mənsubiyyətinə görə milyonlarla insanın hüquqlarını pozmaqda davam edən millətçi dövlətin rəhbərləri beynəlxalq hüququn pozulmasına adi hal kimi baxır, insanlığa qarşı ən çirkin əməllərə əl atırlar”, - deyə komitə sədri qeyd edib.
Deputatın sözlərinə görə, Fransanın çirkin əməlləri Azərbaycana qarşı münasibətdə də özünü aydın şəkildə göstərir. Çoxsaylı ölkələrdə əhalini etnik təmizləməyə məruz qoyan, insanlara öz dilində danışmağı belə qadağan edən, müstəqilliyə can atan xalqları silah gücünə susduran Fransa bu gün Emmanuel Makronun hakimiyyəti dövründə təcavüzkar - 30 il Azərbaycan torpaqlarını işğal altında saxlayan, həmin ərazilərdə əhalinin var-dövlətini talayan, şəhər və kəndlərimizi viran qoyan, on minlərlə insanımızın məhvinə səbəb olan Ermənistanın yanında durmaqla, onu silahlandırmaqla Cənubi Qafqazda riyakar məqsədlərini həyata keçirmək niyyətindədir. Ermənistanla Fransanı bir-birinə yaxınlaşdıran isə onların təcavüzkarlıq, insanlıq əleyhinə yönələn əməlləridir. Qarabağdan könüllü gedən erməniləri dünyaya “etnik təmizləmə” kimi təqdim etməklə, “soyqırımı”, “zorakılıq” kimi ifadələri ortaya atmaqla Fransa yenidən aranı qarışdırmağa, müharibəni alovlandırmağa çalışır. Çünki özü təcavüzkardır, sui-qəsdlər, mina terroru törətməkdə mahirdir. Faktlar sübut edir ki, Fransa dünyada ən çox mina istifadə edən, bu yolla kütləvi qırğınlar törədən dövlətlərdən biridir. Əlcəzair ərazisində 5 milyondan artıq minanın basdırılması vəzifəsini öhdəsinə götürən və bundan qürur duyan Fransa dövləti Ermənistandan da bu təcrübəsini əsirgəməyib. Məhz buna görə son 3 ildə 330-dan çox vətəndaşımız Ermənistanın basdırdığı minaların qurbanı olub və bu gün də mina təhlükəsi hər an insanları izləməkdədir.
“Fransada neokolonializm meylləri ilə bərabər. irqçilik və islamofobiyanın geniş yayılması onun bəşəri dəyərlərdən uzaq olduğunu sübut edir. İnsanlar milliyyətinə, dininə, rənginə görə təzyiqlərə, təhqirlərə, hücumlara məruz qalır, bəzi hallarda qətlə də yetirirlər. Belə eybəcər bir siyasət yürüdən ölkə isə başqalarına demokratiya, insan azadlıqları dərsi keçir, dövlətlərin daxili işlərinə qarışır, etnik bərabərliyi təbliğ edir. Təcavüzkar Ermənistanı dəstəkləmək, silahlandırmaq, onun əvəzinə beynəlxalq tribunalardan Azərbaycan əleyhinə böhtanlar, iftiralar söyləmək, Avropa Parlamentini, AŞPA-nı, bəzi digər beynəlxalq təşkilatları ölkəmizə qarşı bəyanatlar, qərarlar qəbul etməsinə sürükləmək başda E. Makron olmaqla Fransanın hakimiyyət dairələrinin vərdişinə çevrilib. Fransa Cənubi Qafqazda maraqlarını təmin etmək, bu xalqları təsir altına salmaq üçün Ermənistana hərbi yardım göstərir, müdafiə sahəsində müqavilə imzalayır, separatçılara hərbi-siyasi dəstək verir. Ancaq bütün bunlar səmərəsiz, əsası olmayan gedişlərdir. Çünki Azərbaycan beynəlxalq hüququn norma və prinsiplərinə əsaslanaraq öz torpaqlarını azad edib, suverenliyini qoruyub, sərhədlərini, beynəlxalq aləmdə mövqeyini möhkəmləndirib. Otuz ildə BMT-nin , ATƏT-in və bir çox beynəlxalq təşkilatların edə bilmədiklərini Ali Baş Komandan İlham Əliyevin rəhbərliyi ilə şanlı Ordumuz və xalqımız öz gücünə həyata keçirib, düşmənin başını əzib. Əgər düşmən və havadarları düz yola gəlməsələr, daha ciddi tədbirlər görülə bilər və Azərbaycan xalqı buna hər an hazırdır”, - deyə T.Rzayev vurğulayıb.
Bölmənin digər xəbərləri
