FRANSA GİROV GÖTÜRÜLMÜŞ JURNALİSTLƏRİN AZAD EDİLMƏSİ MƏQSƏDİ İLƏ SƏFƏRBƏR OLUNUB
Fransa diplomatiyasının başçısı Misirə, Qətərə və Bağdada səfərə çıxmış, bu ölkələrin dövlət rəhbərləri və din xadimləri ilə görüşlər keçirmiş və onlardan girov götürülənlərin azad edilməsi üçün öz nüfuzlarından istifadə etmələrini xahiş etmişdir.
Girov götürülmüş Kristian Şeno və Jorj Malbrünonun azad edilməsi ilə bağlı demək olar ki, ölkənin hər yerində həmrəylik mitinqləri keçirilir. Asamble Nasyonalın və Senatın sədrləri Jan-Lui Debrenin və Kristian Ponselenin təşəbbüsü ilə avqustun 30-da Parisin Trokadero meydanında izdihamlı mitinq keçirilmişdir. Digər bir mitinq isə “Radio evi”nin qarşısında təşkil edilmişdir. Mitinq iştirakçıları hər iki jurnalistin tezliklə azad olunmasını tələb etmişlər.
Ölkənin siyasi partiyalarının liderləri də bu məsələyə münasibətlərini bildirərək günahsız jurnalistlərin azad olunması ilə əlaqədar bəyanatlar vermişlər.
Dünya ictimaiyyəti, o cümlədən, Avropa Birliyi, Misir, Fələstin, İordaniya və Livan kimi ərəb ölkələrinin rəsmi dairələri, din xadimləri bu hadisəni pisləmişlər.
Xatırladaq ki, Əl-Cəzirə televiziya kanalında avqustun 30-dan 31-nə keçən gecə nümayiş etdirilmiş videoyazıda girov götürülmüş jurnalistlərdən biri – Kristian Şenonun ölkə Prezidenti Jak Şiraka Fransa məktəblərində müsəlman qızların baş örtüyü ilə gəlmələrini qadağan edən qərarı ləğv etməsi ilə bağlı çağırışı səslənmişdir.
Yeri gəlmişkən qeyd edək ki, girov götürülmüş jurnalistlərlə əlaqədar Fransa hökumətinə verilmiş ultimatumun vaxtı daha 24 saat uzadılmışdır.
