Fransa hökumətində kadr dəyişikliyi gözlənilir
Paris, 13 iyun, AZƏRTAC,
Fransa hökumətində yaxın günlərdə kadr dəyişiklikləri olacağı ilə bağlı fikirlər səsləndirilir. Pensiya islahatının zorla qəbulundan sonra yaranmış böhranın 100 günə sakitləşdirilməsini vəd etmiş hökumətin başı üzərində qara buludlar dolaşır.
AZƏRTAC xəbər verir ki, vəd olunan 100 gün sona yaxınlaşdıqca, hökumətdə də narahatlıqlar artır. Bəzi nazirlər artıq vəzifədə son günlərini yaşadıqlarını aydın dərk edirlər.
Nazirlər Kabinetindəki mənbənin verdiyi məlumata görə, hökumət dəyişikliyi 14 iyuldan əvvəl gözlənilir. Nazirlərdən biri Baş nazirin öz işinin öhdəsindən yaxşı gəldiyini, ancaq Prezident Emmanuel Makronla baxışlarının üst-üstə düşmədiyini deyib. Baş nazir postuna namizədlər arasında Julyen Denormandi və Rişar Ferranın adı çəkilir. Ədliyyə naziri Erik Dupond-Moretti, əmək naziri Olivier Dussopt, sosial iqtisadiyyat və həmrəylik üzrə dövlət katibi Marlène Schiappa, səhiyyə naziri Fransua Braun və təhsil naziri Pap Ndiayenin öz vəzifələri ilə xudahafizləşəcəyi bildirilir.
Adının açıqlanmasının istəməyən bir nazir isə “müdafiəçi yox, hücumçu nazirlər”ə ehtiyac olduğunu söyləyib. Qeyd edilir ki, Fransanın indiki vəziyyətində nazir vəzifəsi artıq arzu edilən vəzifə deyil.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
