Fransada yarım ildə 33 mindən çox sahibkar fəaliyyətini itirib
Paris, 26 avqust, AZƏRTAC
İqtisadi kövrəkliyin davam etdiyi Fransada ən çox üçdən az işçisi olan kiçik müəssisələrin rəhbərləri zərər çəkib.
AZƏRTAC xəbər verir ki, Fransada 2026-cı ilin ilk altı ayında 33 mindən çox şirkət rəhbəri fəaliyyətini itirib. GSC-Altares Observatoriyasının açıqladığı məlumatlara görə, bu göstərici ötən ilin eyni dövrü ilə müqayisədə təxminən 7 faiz artıb.
İqtisadi vəziyyətin kövrək olaraq qaldığı bir şəraitdə ən çox zərər çəkənlər kiçik müəssisələrdir. Üçdən az işçisi olan şirkətlərin rəhbərləri bütün itirilmiş iş yerlərinin təxminən 75 faizini təşkil edir.
Lakin böhran daha böyük şirkətlərə də təsir göstərir. Yarım ildə ən azı 20 işçisi olan müəssisələrin 694 rəhbəri fəaliyyətini dayandırıb, 50-dən çox işçisi olan şirkətlərdə isə rəhbərlərin iş itkisi bir il ərzində 52 faizədək artıb. Dövriyyəsi 5 milyon avrodan çox olan müəssisələrdə bu artım 26,4 faiz, 10 milyon avronu keçən şirkətlərdə isə 47,3 faiz təşkil edib.
Sektorlar üzrə tikinti sahəsi ilk sıradadır. İlin ilk altı ayında bu sektorda 7718 şirkət rəhbəri fəaliyyətini itirib ki, bu da ölkə üzrə ümumi göstəricinin təxminən dörddəbirinə bərabərdir.
İkinci yerdə 6971 sahibkarla ticarət sektoru gəlir. Mehmanxana və restoran sahəsində 5057 rəhbər fəaliyyətini itirib ki, bu da bir il ərzində 10,4 faizlik artım deməkdir. Müəssisələrə xidmət sektorunda isə itkilər 15,2 faiz artaraq 4770 sahibkara çatıb.
GSC-nin prezidenti Erve Kermarresin sözlərinə görə, sahibkarın fəaliyyətini itirməsi bütün sahibkar profillərinə təsir edə bilər və heç bir şirkət rəhbəri bundan sığortalanmayıb.
Qurumun araşdırmalar direktoru Thierry Millon isə bildirir ki, 33 mindən çox şirkət rəhbərinin fəaliyyətini itirməsi onların müəssisələrində çalışan təxminən 80 min muzdlu işçinin də iş yerini itirməsinə səbəb olub.
Bölmənin digər xəbərləri
