Bakı, 26 oktyabr, AZƏRTAC

Azərbaycanın 44 günlük Vətən müharibəsində Ermənistan üzərində qazandığı tarixi Qələbədən və bir ay əvvəl Qarabağda keçirdiyi antiterror tədbirlərindən sonra ərazi bütövlüyümüzün tam təmin olunması, Xankəndidə, Xocalıda, Əsgəranda Azərbaycan Bayrağının dalğalanması ölkəmizin dünya birliyindəki reytinqini daha da yüksəldib. Bu qələbələrdən sonra ölkəmizlə əməkdaşlıq etmək istəyən dövlətlərin sayı xeyli artıb. Bütün bunlar Ermənistanı, ermənipərəst dövlətləri və şər-böhtanı özünə peşə seçən bəzi qərəzli beynəlxalq təşkilatları təşvişə salıb. Son vaxtlar Azərbaycana qarşı artan təzyiq və təhdidlərə də əsas səbəb budur. Fransanın Ermənistanla hərbi əməkdaşlığa dair müqavilə imzalaması, bir-birinin ardınca ölkəmizin əleyhinə iftira və yalanla dolu qətnamələrin qəbul edilməsi, separatçı rejim tərəfindən Qarabağdan zorla köçürülən ermənilərə humanitar yardım göstərilməsinin əsas məqsədi ölkəmizə təzyiq vasitəsidir.

Bu fikirləri AZƏRTAC-a açıqlamasında siyasi şərhçi Əliqismət Bədəlov deyib.

O, bütün bunların arxasında Fransanın dayandığını bildirib. Avropa Parlamentinin, AŞPA-nın, buna qədər Fransa Senatının və Milli Assambleyasının, habelə bəzi digər ölkələrin parlamentlərinin Azərbaycana qarşı qərəzli qətnamələri məhz Fransa və onun prezidenti Emmanuel Makronun “dirijorluğu” ilə qəbul edilir. Çünki belə qərəzli qətnamələrin ilki Fransa Senatı və Milli Assambleyası tərəfindən qəbul edilib: “Xatırladım ki, Fransa Senatının 2022-сi il noyabrın 15-də məlum qətnaməni qəbul etməsinin ardınca bu ölkənin Milli Assambleyası tərəfindən noyabrın 30-da Azərbaycana qarşı daha bir siyasi aksiya təşkil olundu. Milli Assambleya da beynəlxalq hüquq normalarına və prinsiplərinə açıq hörmətsizlik nümayiş etdirən, dövlətimizin ərazi bütövlüyünü və suverenliyini hədəfə alan qərəzli, qeyri-obyektiv və ədalətsiz bir akt qəbul etdi. Bu qətnamələr Fransa qanunverici orqanlarının siyasi avantüra meydanına çevrilməsinin və siyasi riyakarlığının bariz nümunəsidir”.

Siyasi şərhçi deyib ki, son zamanlar Fransa Cənubi Qafqazda aqressiv siyasətinin açıq formasına keçib. Görünür, bu ölkə Əlcəzair xalqına qarşı törətdiyi zorakılığı, kütləvi qəddarlığı davam etdirmək niyyətindədir. Elə deyilsə, Ermənistana silah satmaqda, birgə hərbi təlimlər keçirməkdə və hərbi əməkdaşlıq barədə müqavilə bağlamaqda məqsədi nədir? Təbii ki, Fransa və Ermənistan arasında hərbi sahədə əməkdaşlıq, bununla bağlı imzalanan sonuncu müqavilə regionda yaranmaqda olan sülh prosesinin pozulmasına və Azərbaycanın milli təhlükəsizliyinə xələl gətirəcək. Ümumiyyətlə, Fransa uzun əsrlərdir ki, yoxsul Afrika ölkələrini soyub talayır, qitədə neokolonializm siyasətini davam etdirir, həmin ölkələrin rəsmi və tədris dilinin fransızca olması, məcburi təhsilin tətbiqi üçün bütün zorakı vasitələrdən istifadə edir. Fransa yeni müstəmləkəçilik siyasətinin adını dəyişməklə bir sıra əraziləri öz nəzarətində saxlamağa çalışır.

Ə.Bədəlov deyib ki, Fransanın “dirijorluğu” ilə qəbul edilmiş qərəzli qətnamələr, ümumiyyətlə, heç bir qüvvə Azərbaycanı mövqeyindən döndərə bilməyəcək. Prezident İlham Əliyevin müəyyənləşdirdiyi siyasi kurs ölkəmizin dünya birliyindəki reytinqini getdikcə artırır, mövqeyini, iqtisadi və hərbi qüdrətini möhkəmləndirir: “Dünya ictimaiyyətinə də bəllidir ki, Azərbaycan dövlətinin Qarabağda həyata keçirdiyi antiterror tədbirləri məhz regional sülh, təhlükəsizlik və sabitlik qarşısında dayanan ən böyük maneəni - separatizmi, qeyri-qanuni erməni silahlı birləşmələrinin təxribatlarını, mina terrorunu və ölkəmizin ərazi bütövlüyünü pozmaq cəhdlərini aradan qaldırdı. Ölkəmiz əleyhinə qəbul edilmiş qərəzli qətnamələrin əksinə olaraq, bu gün Qarabağ bölgəsində yaşayan erməni sakinlərin Azərbaycan cəmiyyətinə reinteqrasiyası, sosial, humanitar, iqtisadi və infrastruktur məsələlərinin həlli istiqamətində tədbirlər uğurla davam etdirilir. Bunu bölgəyə səfər etmiş BMT-nin ixtisaslaşmış qurumlarının nümayəndələrinin hesabat və bəyanatları da təsdiqləyir”.

Siyasi şərhçi son vaxtlar Ermənistanla Azərbaycan arasında sülh sazişinin imzalanması istiqamətində əlverişli imkanlar yarandığını diqqətə çatdıraraq deyib ki, hətta baş nazir Nikol Paşinyanın ziddiyyətli mövqeyinin olmasına baxmayaraq, o da ilin sonunadək sülh müqaviləsinin imzalanmasının mümkünlüyünü vurğulayıb. Ancaq Fransa müxtəlif vasitələrlə, xüsusilə Qarabağda etnik təmizləməni bəhanə gətirərək, sülh prosesini pozur və buna əngəl yaradır. Əslində, Fransa Qarabağda antiterror tədbirlərinin BMT-də müzakirəsinə nail olmaq istəyir.

“Bəzi Avropa ölkələrinin, xüsusilə Avropa Parlamentindəki destruktiv qüvvələrin təsiri və təzyiqi Azərbaycana qarşı bu cür qeyri-obyektiv addımların atılmasına və əsassız iddialar üzərində tərtib olunmuş qətnamələrin qəbul edilməsinə rəvac verir. Təəssüf ki, bu qətnamələrdə əsl reallıq - Ermənistanın Azərbaycana qarşı ərazi iddiaları, ölkəmizə qarşı hərbi işğal və soydaşlarımızın etnik təmizləməyə məruz qalması öz əksini tapmayıb. Ona görə də belə yalan və iftiralarla “zəngin”, regionda baş verən hadisələri obyektiv əks etdirməyən, beynəlxalq hüquq normalarına zidd olan qətnamələr ictimaiyyətdə ikrah hissi yaradır”, -deyə Ə.Bədəlov bildirib.