Fransanın Miluz və Azərbaycanın Yevlax şəhərləri arasında dostluq xartiyası imzalanmışdır
Miluz, 22 iyun (AZƏRTAC). Miluz Şəhər Bələdiyyə İdarəsində Fransanın Miluz və Azərbaycanın Yevlax şəhərləri arasında dostluq xartiyasının imzalanması mərasimi keçirilmişdir.
Mərasimi açan Miluz şəhərinin meri Jan Rotner son illər Fransa ilə Azərbaycan arasında əməkdaşlığın inkişaf etdiyini, Miluz və Yevlax şəhərləri arasında imzalanacaq dostluq xartiyasının bunun bariz nümunəsi olduğunu bəyan etmişdir. Mer xartiyanın dostluq əlaqələrinin möhkəmlənməsinə töhfə verəcəyinə, bu sənəd sayəsində iqtisadi, turizm, mədəni sahələrdə əlaqələrin genişlənəcəyinə ümidvar olduğunu bildirmişdir.
Yevlax Şəhər İcra Hakimiyyətinin başçısı Qoca Səmədov səmimi qarşılandıqlarına görə merə və mərasimin iştirakçılarına təşəkkür etmiş, Miluz şəhərinin onlarda böyük təəssürat yaratdığını, Azərbaycan ilə Fransa arasında sıx dostluq münasibətlərinin mövcud olduğunu bildirmişdir. O, Azərbaycan Prezidenti İlham Əliyevin Fransaya səfərlərinin ölkələrimiz arasında əlaqələrin inkişafına verilən önəmin göstəricisi olduğunu vurğulamışdır.
Ötən il Heydər Əliyev Fondu tərəfindən Miluzda iki tədbirin keçirildiyini və həmin tədbirlərin davamı olaraq növbəti dəfə iyunun 20-də Azərbaycanın görkəmli şairəsi Məhsəti Gəncəvinin yaradıcılığının 900 illiyi münasibətilə Miluz Universitetində konfrans təşkil olunduğunu xatırladan Q. Səmədov imzalanacaq xartiyanın iki şəhər arasında dostluq və əməkdaşlıq münasibətlərinin yaranmasında başlanğıc olduğunu diqqətə çatdırmışdır.
Azərbaycanın Gəncə və Yevlax şəhərləri ilə Miluz arasında əlaqələrin iki il əvvəl başlandığını, mədəni istiqamətdə bir çox tədbirlərin keçirildiyini xatırladan senator Jan-Mari Bokel ötən ildən etibarən universitetlər səviyyəsində əlaqələrin yarandığını bildirmişdir.
Senator mövcud əlaqələrin daha da inkişaf etdirilməsi üçün xartiya imzalanacağını və bu sənədin sadəcə Miluz ilə deyil, eyni zamanda, Miluzətrafı regionun Yevlax rayonu ilə qardaşlaşmasına öz töhfəsini verəcəyini qeyd etmiş və bunun mühüm addım olduğunu bildirmişdir.
Azərbaycanın Gəncə və Yevlax şəhərlərinə səfər etdiyini xatırladan Jan-Mari Bokel yaranan əlaqələrin iki ölkə arasında tərəfdaşlığa töhfəsini verdiyini, Azərbaycan nümayəndə heyətinin Miluza səfərinin ölkəmizin Avropa Şurasının Nazirlər Komitəsinə sədrliyi dövrünə təsadüf etdiyini və dostluq xartiyasını yaşatmaq üçün əllərindən gələni edəcəklərini vurğulamışdır.
Bu gün Azərbaycan ilə Fransa arasında dostluq əlaqələrinin yeni səhifəsinin açıldığını diqqətə çatdıran Azərbaycanın Fransadakı səfiri Elçin Əmirbəyov Miluz Universitetində Azərbaycan şairəsi Məhsəti Gəncəvinin yaradıcılığının 900 illiyi münasibətilə keçirilən konfransın əməkdaşlığın inkişafı sahəsində mühüm rolunu qeyd etmiş, belə tədbirlərin və görüşlərin Azərbaycanın xarici siyasəti çərçivəsində həyata keçirildiyini, Fransanın ölkəmiz üçün həm dost, həm də strateji tərəfdaş olduğunu bildirmişdir.
Mərasimin sonunda dostluq xartiyası imzalanmışdır.
Xartiyanı Miluz şəhərinin meri Jan Rotner və Yevlax Şəhər İcra Hakimiyyətinin başçısı Qoca Səmədov imzalamışlar.
Əsgər Əliyev
AZƏRTAC-ın xüsusi müxbiri
Miluz
Bölmənin digər xəbərləri
