Fransanın nüfuzlu “Frans-Press” agentliyi Azərbaycanın caz ustalarının Parisdə çıxışı barədə məlumat yaymışdır
Paris, 31 oktyabr (AZƏRTAC). Fransanın nüfuzlu “Frans-Press” agentliyi “JazzyColors”, kiçik caz ölkələrinin Parisdə güzgüsü” sərlövhəli məlumat yaymışdır.
Məlumatda bildirilir ki, noyabr ayında Fransa paytaxtında xarici ölkələrin mədəniyyət mərkəzlərində və institutlarında təşkil ediləcək “JazzyColors” festivalı kiçik caz ölkələrinin musiqiçilərinə ilk dəfə Parisdə çıxış etmək imkanı verəcəkdir. 2011-ci ildən “JazzyColors”a sədrlik edən Serbiya Mədəniyyət Mərkəzinin canlı tamaşalar bölümünün rəhbəri Vladimir Marinkoviç “Frans-Press” agentliyinə bildirmişdir ki, bizim məqsədimiz öz ölkəsində tanınan, lakin Fransada məşhur olmayan caz ustalarını musiqisevər fransızlara təqdim etməkdir. Festivala qatılacaq 25-dək qrup və musiqiçinin demək olar ki, yarısı Parisdə ilk dəfə çıxış edəcəkdir.
Daha sonra V.Marinkoviç “Serbian Jazz Bre” və Azərbaycanın 2005-ci ildən indiyədək Bakı caz festivalında mütəmadi iştirak edən Afqan Rəsul caz üçlüyünün Paris səhnəsində çıxış edəcəyini diqqətə çatdırmışdır.
Məlumatın sonunda 2003-cü ildə yaradılmış “JazzyColors” festivalının sürətlə inkişaf etdiyi və hər il bu musiqi bayramına yeni ölkələrin qoşulduğu qeyd edilir. Festivala bu il qoşulan 8 ölkə arasında Azərbaycan və Meksika cazmenlərinin olduğu vurğulanır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
