FT: Fransadakı etirazlar hakimiyyətin acizliyini üzə çıxarıb
Bakı, 20 oktyabr, AZƏRTAC
Fransada kütləvi etirazlar hakimiyyətin ictimai narazılıq qarşısında acizliyini üzə çıxarıb. Nümayişlərin miqyasının düzgün qiymətləndirilməməsi və böhranın həllinə yanaşma suallar doğurur.
AZƏRTAC xəbər verir ki, bu barədə Britaniyanın “Financial Times” (FT) qəzeti yazıb.
Nəşrin fikrincə, küçə zorakılığının genişlənməsi hökumətin vəziyyətə nəzarəti itirdiyi təəssüratını yaradır, dövlət institutlarına ictimai etimadı zəiflədir və Fransanın beynəlxalq nüfuzuna xələl gətirir. Qəzet Limoges şəhərində bələdiyyə binasının yandırılmasının Prezident Emmanuel Makronun siyasi nüfuzuna əlavə zərbə vurduğunu qeyd edir.
Məqalədə hazırkı etirazlar 2018-ci ilin “sarı jiletlilər” hərəkatı ilə müqayisə olunur. Bildirilir ki, həmin vaxt hökumət böhranın həlli üçün 11 milyard avro ayırsa da, hazırda Fransanın maliyyə imkanları məhduddur.
Qəzet vurğulayır ki, kütləvi narazılıq ölkənin dərin sosial problemlərini üzə çıxarıb, siyasi qüvvələr isə onların həllində çətinlik çəkirlər.
Xatırladaq ki, oktyabrın 17-də Fransada yanacağın qiymətinin artmasına və alıcılıq qabiliyyətinin azalmasına qarşı kütləvi nümayişlər keçirilib. Təşkilatçılar aksiyalarda 800 min nəfərin iştirak etdiyini bildirsələr də, Daxili İşlər Nazirliyi bu rəqəmin 550 min olduğunu açıqlayıb. Bir sıra şəhərlərdə etirazlar iğtişaşlara və polislə toqquşmalara çevrilib.
Bölmənin digər xəbərləri
