“FUTBOL DÜNYASI” AZƏRBAYCAN–POLŞA OYUNUNA XÜSUSİ BURAXILIŞ HƏSR ETMİŞDİR
AZƏRTAC AFFA-nın saytına istinadla xəbər verir ki, “Futbol dünyası” qəzetinin iyunun 2-də Tofiq Bəhramov adına Respublika stadionunda keçiriləcək Azərbaycan-Polşa qarşılaşmasına həsr olunmuş nəfis tərtibatlı xüsusi buraxılışı çapdan çıxmışdır.
Buraxılışda Azərbaycan və Polşa yığmalarının heyətləri, oyunu idarə edəcək hakimlər briqadası barədə məlumat verilmişdir. Millimizin yer aldığı A qrupunda indiyə qədər keçirilən oyunların nəticələri, qeyd olunan qrupda ən çox qol vuran futbolçuların adları, Azərbaycan-Polşa oyununu idarə edəcək kiprli baş hakim Kostas Kapitanisin dünya və Avropa çempionatlarının seçmə mərhələlərində idarə etdiyi oyunların statistikası əksini tapmışdır.
Kitabçada digər qruplardakı turnir cədvəlləri və iyunun 2-6-da keçiriləcək oyunların təqvimi ilə tanış olmaq da mümkündür.
Buraxılışın bir səhifəsi Azərbaycan futbolunun əfsanəsi Anatoli Banişevskiyə həsr olunmuşdur. Mərhum futbolçu müsahibələrinin birində SSRİ yığmasının heyətində çıxış edərkən ən gözəl qolunu məhz Polşa millisinin qapısına vurduğunu bildirmişdir.
Bölmənin digər xəbərləri
