Füzuli rayonunun ictimaiyyəti şəhidlərin əziz xatirəsinə dərin ehtiramını bildirmişdir
Füzuli, 21 yanvar (AZƏRTAC). Azərbaycan xalqının tarixinə Qanlı Yanvar faciəsi kimi daxil olmuş 1990-cı ilin 20 Yanvar hadisələrinin 24-cü ildönümü Füzuli rayonunda da silsilə tədbirlərlə qeyd olunmuşdur.
AZƏRTAC xəbər verir ki, silsilə tədbirlər çərçivəsində rayonun idarə və təşkilatlarında, təhsil və mədəniyyət müəssisələrində anma mərasimləri, konfranslar, yığıncaqlar, tamaşalar, kitab, rəsm və fotosərgilər, xatirə gecələri təşkil edilmişdir.
Rayon ictimaiyyəti, ağsaqqallar, gənclər, ziyalılar, əmək kollektivlərinin nümayəndələri, əsgərlər Bala Bəhmənli kəndində şəhidlərinin xatirəsinə ucaldılmış abidənin qarşısında şəhidlərin əziz xatirəsinə ehtiramlarını bildirmiş, önünə gül-çiçək düzmüşlər.
Mərasimdə çıxış edənlər 1990-cı il yanvarın 20-də törədilmiş faciədən, Vətənin azadlığı və ərazi bütövlüyü uğrunda canlarından keçən həmvətənlərimizin mübarizliyindən danışmış, faciəyə hüquqi-siyasi qiymət verilməsində, şəhidlərin adının əbədiləşdirilməsində ümummilli lider Heydər Əliyevin xidmətlərini yüksək qiymətləndirmişlər.
Şəhidlərin xatirəsi bir dəqiqəlik sükutla yad edilmiş, dualar oxunmuşdur.
Bölmənin digər xəbərləri
