Füzulidə şəhidlərin xatirəsi anılıb, məzarları ziyarət olunub
Füzuli, 16 oktyabr, Aydın Yavərzadə, AZƏRTAC
Füzulidən olan üç şəhidin anım günündə məzarları ziyarət olunub. Müqəddəs amal uğrunda şəhadətə ucalan şəhidlərin şərəfli həyatından bir daha söhbət açılıb. Torpaqlarımızın azad edilməsi üçün silaha sarılaraq canlarını fəda edən şəhidlərimizin xatirəsinin hər zaman uca tutulduğu bir daha diqqətə çatdırılıb.
AZƏRTAC-ın bölgə müxbiri xəbər verir ki, anım mərasimində şəhidlərin ailə üzvləri ilə bərabər rayon icra hakimiyyətinin əməkdaşları, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin nümayəndələri, təhsil və mədəniyyət işçiləri, şəhid ailələri, qazilər, kənd sakinləri və ziyalılar iştirak ediblər.
X X X
Məmmədov Rövlan Qurban oğlu əslən Füzuli rayonu Qaraxanbəyli kəndindən olan və Bakıda məskunlaşan məcburi köçkün ailəsində 2001-ci il mayın 24-də anadan olub. Xətai rayon 194 nömrəli tam orta məktəbdə təhsil alıb. Məktəbi bitirdikdən sonra 2019-cu ildə həqiqi hərbi xidmətə yollanıb. Uğurlu xidmətinə əsasən Xüsusi Təyinatlı Qüvvələrə seçilib. 2020-ci il sentyabrın 27-də başlanan Vətən müharibəsi zamanı Rövlan Məmmədov Füzuli, Cəbrayıl, Kəlbəcər döyüşlərində iştirak edib. Rövlan 15 oktyabr 2020-ci ildə Cəbrayıl istiqamətində gedən şiddətli döyüşlərdə qəhrəmancasına şəhidlik zirvəsinə yüksəlib və Zabrat qəsəbə qəbristanlığında torpağa tapşırılıb. Azərbaycan Respublikasının Prezidenti İlham Əliyevin sərəncamına əsasən Rövlan Məmmədov ölümündən sonra “Azərbaycan Bayrağı” ordeni və “Kəlbəcərin azad olunmasına görə”, “Füzulinin azad olunmasına görə”, “Cəbrayılın azad olunmasına görə”, “Cəsur döyüşçü”, “Vətən uğrunda” medalları ilə təltif olunub.
X X X
Baxışov İlqar Adışirin oğlu İlqar 2000-ci il noyabrın 21-də Horadiz şəhərində anadan olub. İlqar azyaşlı vaxtlarından Vətənə olan sevgisi ilə seçilib. 2019-cu ildə həqiqi hərbi xidmətə də ruh yüksəkliyi ilə yollanan İlqar Tərtər rayonunda ön cəbhədə xidmətdə olub. Vətən müharibəsi başlanan tarixdən döyüş əməliyyatlarında böyük şücaətlə iştirak edib. Suqovuşanın mənfur işğalçılardan azad olunması zamanı 15 oktyabr 2020-ci il tarixində qəhrəmancasına şəhidlik zirvəsinə yüksəib. Horadiz şəhər qəbiristanlığında dəfn edilib. Azərbaycan Respublikasının Prezidenti İlham Əliyevin sərəncamına əsasən İlqar Baxışov ölümündən sonra “Suqovuşanın azad olunmasına görə”, “İgidliyə görə”, “Vətən uğrunda” medalları ilə təltif edilib
X X X
Paşayev Elgün İlham oğlu Füzuli rayonundan olan, Sabirabad rayon Qalaqayın kəndində məskunlaşan məcburi köçkün ailəsində, 1994-cü il martın 4-də anadan olub. Sonralar ailəsi ilə bərabər Füzuli rayon İkinci Zobucuq qəsəbəsində məskunlaşıblar. Həqiqi hərbi xidməti zamanı Elgün sərhədçi əsgər kimi xidmətdə olub. Xidmətini başa vurduqdan bir neçə il sonra Elgün müddətdən artıq hərbi xidmətçi kimi Vətənin keşiyində dayanıb. Azərbaycan Ordusunun kiçik çavuşu olan Elgün Paşayev 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə şücaətlə döyüşüb. Düşmən sədlərinin yarılmasında qəhrəmanlığı ilə seçilib və Füzuli döyüşləri zamanı qəhrəmancasına şəhidlik zirvəsinə yüksəlib. Azərbaycan Respublikasının Prezidenti İlham Əliyevin Sərəncamına əsasən Elgün Paşayev ölümündən sonra “Vətən uğrunda”, “Cəsur döyüşçü”, “Füzulinin azad olunmasına görə”, “Xocavəndin azad olunmasına görə” medalları ilə təltif edilib.
Bölmənin digər xəbərləri
