Füzulidən Şuşayadək döyüş yolu keçərək şəhidlik zirvəsinə ucalan üçqat dünya çempionu VİDEO
Xaçmaz, 8 oktyabr, Elxan Yusifli, AZƏRTAC
Şəhid Kərəm Veyisov həm idman yarışlarında, həm də döyüş meydanında bayrağımızı şərəflə dalğalandıran qəhrəman kimi yaddaşlarda qalıb. Xaçmazlı kikboksçu, üçqat dünya çempionu Kərəm Veyisov Vətən müharibəsində Füzulidən Şuşayadək döyüş yolu keçərək qəhrəmancasına şəhid olub.
AZƏRTAC-ın bölgə müxbiri xəbər verir ki, Kərəm 1998-ci ildə Xaçmaz şəhərində anadan olub. Hərbi xidmətini başa vuran Kərəm iyul döyüşlərindən sonra ordu sıralarına könüllü yazılıb. Vətən müharibəsinin ilk günlərindən cəbhəyə yollanan qəhrəman çavuş manqa komandiri kimi döyüşlərə atılıb. Füzuli uğrunda gedən ağır döyüşdə yaralansa da, bir həftə sonra yenidən silaha sarılaraq cəbhənin ən gərgin istiqamətlərində düşmənə qan uddurub. O, Cəbrayıl, Füzuli, Zəngilan, Qubadlının işğaldan azad olunmasında fəal iştirak edib.
“İyul döyüşlərindən sonra bizə xəbər vermədən hərbi komissarlığa gedib cəbhəyə yollanmaq üçün könüllü yazıldı. Lakin həmin vaxt müharibə olmadı. Vətən müharibəsi başlayanda Kərəm qisas hissi ilə alışıb-yanırdı. Oktyabrın 1-də hərbi komissarlıqdan yola saldıq. Həmin gün onunla birlikdə 58 nəfər xaçmazlı cəbhəyə yollandı. Həmin könüllülər arasında qəhrəmanlıqla döyüşüb yaralananlar çox oldu. Kərəm isə şəhidlik zirvəsinə ucaldı. Kərəm bayrağını, Vətənini sevən övlad idi. İdman yarışlarında da erməni ilə finalda qarşılaşmışdı. Necə ki, idmanda onları diz çökdürmüşdü, savaşda da bunu etdi. Noyabrın 10-da hamı bizə gəlib, Qələbə münasibətilə təbrik edirdi. Amma mən çox narahat idim. Kərəmdən zəng gözləyirdim. Qələbə xəbərini mənə Kərəm verəcəkdi. Amma qismət olmadı. Biz onun şəhid olması xəbərini aldıq”, - deyə şəhidin anası Nərgiz Veyisova bildirib.
Ailəsi Kərəmlə sonuncu dəfə Şuşa uğrunda döyüşlərdən əvvəl danışıb. Kərəm qarşıdakı günlərdə həlledici savaşa qatılacaqlarını bildirib. O, Şuşa uğrunda döyüşlərdə böyük şücaət göstərib və müharibənin başa çatmasına saatlar qalarkən Daşaltıda düşmən mərmisinin yaxınlığında partlaması nəticəsində şəhidlik zirvəsinə ucalıb.
Kərəm Veyisov idman sahəsindəki uğurları ilə də daim diqqəti cəlb edib. On bir yaşından kikboksinqlə məşğul olan Kərəm dəfələrlə Azərbaycan birinciliyinin, bir sıra nüfuzlu beynəlxalq yarışların, o cümlədən üç dəfə dünya çempionatının qalibi adını qazanıb. Özünün “Çempion” kikboksinq klubunu yaradaraq, məşqçi kimi fəaliyyətə başlamışdı.
“Kərəm kikboksinq üzrə beynəlxalq yarışlarda dəfələrlə uğur qazanmışdı. Döyüşlərdə də həmişə xoş sorağı gəlirdi. Bizimlə danışanda heç hiss etdirmirdim ki, savaşın içindədir. Onlar Qubadlını azad edəndə danışmışdıq. Dedi ki, yaxın günlərdə Şuşaya qalxırıq. Noyabrın 7-də Şuşa döyüşləri zamanı şəhid oldu. Zəfər Gününü yaşamasa da, Şuşaya bayrağımızın sancıldığını, düşmənin məğlub olduğunu görmüşdü”, - deyə şəhidin atası Səttər Veyisov söyləyib.
Kərəm Veyisov ölümündən sonra "Vətən uğrunda", "Füzulinin azad olunmasına görə", "Qubadlının azad olunmasına görə", "Şuşanın azad olunmasına görə”, "Döyüşdə fərqlənməyə görə" və "İgidliyə görə" medalları ilə təltif olunub.
Bölmənin digər xəbərləri
