Füzulinin kəndlərində yeni subartezian quyuları qazılır
Füzuli, 18 avqust, AZƏRTAC
Cəbhə bölgəsində yerləşən Füzuli rayonunda əkin sahələrinin suvarma suyu ilə təminatının yaxşılaşdırılması istiqamətində tədbirlər davam etdirilir.
AZƏRTAC-ın bölgə müxbiri xəbər verir ki, son beş ildə rayonun işğaldan azad olunmuş ərazilərində 55 yeni subartezian quyusu qazılıb. Prezident İlham Əliyevin “Füzuli rayonunda əkin sahələrinin suvarma suyu ilə təminatının yaxşılaşdırılmasına və əhalinin içməli suya tələbatının ödənilməsinə dair əlavə tədbirlər haqqında” 3 aprel 2020-ci il tarixli Sərəncamına əsasən, cari ildə rayonun əhalisi 15 min 373 nəfər olan 9 yaşayış məntəqəsində 14 ədəd subartezian quyusunun qazılması nəzərdə tutulur. Artıq Əhmədbəyli, Aşağı Kürdmahmudlu, Yuxarı Kürdmahmudlu, Kərimbəyli, Şükürbəyli kəndlərində və 11-ci Qayıdış qəsəbəsində subartezian quyuları qazılıb. Qısa vaxtda Alxanlı, Mirzənağılı və İkinci Mahmudlu kəndlərində də subartezian quyularının qazılması başa çatdırılacaq.
Yeni subartezian quyularının istifadəyə verilməsi ilə rayonun 200 hektardan artıq əkin sahəsi suvarma suyu ilə təmin ediləcək.
Bölmənin digər xəbərləri
