Gənc alimlər düşmənə qarşı informasiya savaşında daha fəal olmalıdırlar
Bakı, 24 iyul, AZƏRTAC
Azərbaycan müstəqilliyinə nail olduqdan sonra ölkədə milli təhlükəsizliyin əsas problemlərindən biri vahid informasiya siyasətinin formalaşdırılması və təhlükəsizliyinin təminatı, milli informasiya mühitinin yaradılması, qorunması və idarə edilməsi olub. 1998-ci il aprelin 3-də ölkəmizdə “İnformasiya, informasiyalaşdırma və informasiyanın mühafizəsi haqqında” Qanun qəbul edildi. Azərbaycan Prezidenti İlham Əliyevin “İnformasiya təhlükəsizliyi sahəsində fəaliyyətin təkmilləşdirilməsi tədbirləri haqqında” Fərmanından sonra ölkəmizdə milli informasiya təhlükəsizliyi üzrə mükəmməl strategiyanın yeni mərhələsi başlandı.
Bu sözləri AZƏRTAC-a müsahibəsində AMEA-nın İdarəetmə Sistemləri İnstitutunun İctimaiyyətlə əlaqələr sektorunun rəhbəri, institutun Gənc Alim və Mütəxəssislər Şurasının sədr müavini, iqtisad üzrə fəlsəfə doktoru Aygün Əliyeva deyib. O bildirib ki, müharibə şəraitində yaşayan Azərbaycan üçün informasiya təhlükəsizliyi, dövlət sirri olan hərbi məlumatların yayılmaması ən vacib məsələlərdir və milli təhlükəsizliyə informasiyaların ciddi zərər yetirməməsi baxımından olduqca əhəmiyyətlidir. Artıq Qarabağ münaqişəsi regional xarakterini itirib və qloballaşmış bir problemə çevrilməyə başlayıb. Geostrateji bölgədə olduğundan münaqişənin regiona təhlükə yaratmasında informasiya çox mühüm rol oynayır.
Bildiyimiz kimi, bu gün də ermənilər xarici ölkələrdə olan diasporlarının dəstəyi ilə Azərbaycana qarşı informasiya mübarizəsi aparırlar. Ermənilərin təsiri altında olan təşkilatlar da beynəlxalq ictimai rəydə Azərbaycanla bağlı mənfi rəy formalaşdırmağa davam edirlər. Onlar hətta Amerika mətbuatında Xocalıdakı soyqırımı əks etdirən şəkillər dərc etdirib və öldürülən Azərbaycan vətəndaşlarını erməni kimi təqdim edərək, özlərini zərərçəkən kimi qələmə verirlər. Ermənilər tərəfdən edilən bu kimi yüzlərlə faktı qeyd etmək olar.
Dünya ölkələri pandemiya şəraitində yaşadığı vaxtda, insanların virusla mübarizə apardığı şəraitdə Ermənistan silahlı qüvvələri Azərbaycanın dövlət sərhədində Tovuz rayonu istiqamətində mövqeləri ələ keçirmək məqsədilə atəşkəs rejimini kobud şəkildə pozaraq hərbi təxribata əl atsalar da, düşmən hücumunun qarşısı ordumuz tərəfindən qətiyyətlə alındı. Beləliklə, Ermənistan silahlı qüvvələri son günlər törətdiyi əməlləri ilə bir daha dünyaya özlərinin hiyləgər və terrorçu olduqlarını nümayiş etdirdilər.
“Ermənistan kütləvi informasiya vasitələrində bu gün də döyüş bölgələrindən həqiqətə uyğun olmayan, yalan məlumatlar yayımlanır və ictimaiyyətdə ölkəmizə qarşı mənfi rəy yaratmağa çalışırlar. Biz gənclər bu gün birləşərək həmrəy olmalıyıq və düşmənə qarşı informasiya savaşında fəal iştirak edərək qalib gəlməliyik. İnformasiya savaşı ən çox internet vasitəsilə aparılır və bu savaşın qarşısının alınmasında internetin də rolu danılmazdır. Biz gənclər Azərbaycanın haqq səsini dünyaya çatdırmalı, anti-Azərbaycan təbliğatı aparanlara tutarlı cavablar verməliyik.
Prezident İlham Əliyev gənclərə böyük qayğı göstərir və bu, ölkədə həyata keçirilən islahatlarda da öz əksini tapır. Bu məqamda Prezidentimizin sözləri yada düşür: “Biz çalışmalıyıq və çalışırıq ki, bizim gənclərimiz də milli ruhda böyüsünlər, tərbiyə alsınlar. Milli ruhda, eyni zamanda, multikulturalizm ruhunda”. Ölkəmizdə gənclərimizin intellektual fəaliyyətinin düzgün istiqamətləndirilməsi və nailiyyətlərin əldə olunması üçün mükəmməl şərait yaradılıb. Biz gənc alimlər yaradılan şəraitdən düzgün bəhrələnərək ölkəmizin ictimai-siyasi həyatında iştirak etməli və dövlətimizin başçısının etimadını doğrultmalıyıq. Bu, bizim vətəndaşlıq borcumuzdur!”, - deyə A.Əliyeva vurğulayıb.
Bölmənin digər xəbərləri
