Gənc pianoçu Beynəlxalq Muğam Mərkəzində çıxış edəcək
Bakı, 8 may, AZƏRTAC
Azərbaycanın gənc və istedadlı pianoçularından olan Cəmil Sədizadə növbəti dəfə sənətsevərlərlə görüşə hazırlaşır. Prezident təqaüdçüsü, beynəlxalq müsabiqələr laureatı olan ifaçı “Renessans” adlı solo fortepiano konsert proqramı ilə tamaşaçı qarşısına çıxacaq.
AZƏRTAC xəbər verir ki, musiqi gecəsi mayın 30-da Beynəlxalq Muğam Mərkəzi səhnəsində baş tutacaq.
Gənc yaşına baxmayaraq artıq beynəlxalq musiqi mühitində diqqət çəkməyi bacaran Cəmil Sədizadə dünyanın ən nüfuzlu ali musiqi təhsil ocaqlarından biri olan Manhattan School of Music fortepiano fakültəsinə qəbul olunan dünya üzrə 20 seçilmiş musiqiçidən biri kimi böyük uğura imza atıb. Bu nailiyyət onun peşəkar ifaçılıq bacarığının və musiqiyə olan dərin bağlılığının göstəricisi hesab olunur.
“Renessans” adlı konsert proqramında Azərbaycan və dünya bəstəkarlarının əsərləri səsləndiriləcək. Klassik musiqinin incə çalarlarını müasir interpretasiya ilə təqdim etməyi sevən pianoçu dinləyicilərə həm emosional, həm də yüksək sənətkarlıq nümunəsi vəd edir. Proqramın əsas ideyası musiqidə yenilənmə, daxili dirçəliş və mənəvi yüksəliş fəlsəfəsini əks etdirməkdir.
Konsertdə Azərbaycan bəstəkarlarının əsərləri ilə yanaşı, dünya klassiklərinin fortepiano yaradıcılığından seçilmiş nümunələr də yer alacaq. İfaçının fərdi üslubu, texniki ustalığı və səhnə enerjisinin gecəyə xüsusi rəng qatacağı gözlənilir.
Musiqi ictimaiyyəti tərəfindən böyük maraqla qarşılanan tədbirin gənc istedadların tanıdılması və klassik musiqinin təbliği baxımından əhəmiyyətli mədəni hadisələrdən biri olacağı bildirilir. “Renessans” konserti həm klassik musiqi həvəskarları, həm də gənc ifaçıların yaradıcılığı ilə maraqlanan sənətsevərlər üçün unudulmaz axşam vəd edir.
Bölmənin digər xəbərləri
