“Gənc psixometrik” təcrübə proqramı çərçivəsində iştirakçılarla təlimlər davam etdirilir
Bakı, 23 may, AZƏRTAC
Dövlət İmtahan Mərkəzi (DİM) tərəfindən təhsilin qiymətləndirilməsi sahəsində gənc mütəxəssislər bazasının formalaşdırılması məqsədilə elan edilən “Gənc psixometrik” təcrübə proqramı çərçivəsində iştirakçılarla təlimlər davam etdirilir.
AZƏRTAC xəbər verir ki, bunu Dövlət İmtahan Mərkəzinin (DİM) İdarə Heyətinin sədri Məleykə Abbaszadə ali təhsil müəssisələrinə qəbul imtahanlarının başlaması ilə əlaqədar keçirilən mətbuat konfransında deyib. O bildirib ki, hazırda buraxılış və qəbul imtahanlarında istifadə edilən qiymətləndirmə materiallarının işlənməsi, ekspertizası və yoxlanılması ilə bağlı müəllif, ekspert və marker hazırlığı kurslarında iştirak üçün qeydiyyat prosesi aktivdir: “2017-ci ildən etibarən 178 kurs təşkil olunub və indiyə qədər 3175 nəfər sertifikat alaraq Mərkəzin elektron “Məlumat bazası”na daxil edilib. Bundan başqa, imtahanların təşkilində nəzarətçi kimi iştirak etmək istəyən şəxslər üçün sertifikatlaşdırılma prosesi davam edir”.
DİM rəhbəri bildirib ki, 2019-cu ildən bəri bu proqram çərçivəsində 5900 nəfər uğurla sertifikat əldə edib. Yeni tədris ilinin əvvəlində isə növbəti qeydiyyat mərhələsinin başlanacağı planlaşdırılır.
Bölmənin digər xəbərləri
