Gəncənin orta məktəblərində 20 Yanvar şəhidlərinin xatirəsini anma tədbirləri keçirilir
Gəncə, 11 yanvar (AZƏRTAC). Gəncənin orta təhsil müəssisələrində 20 Yanvar faciəsinin 23-cü ildönümü ilə əlaqədar tədbirlərə başlanılmışdır.
Şəhər təhsil idarəsindən AZƏRTAC-a bildirmişlər ki, artıq bir neçə gündür məktəblilər arasında təbliğat işlərinə başlanılmış, təhsil ocaqlarında 20 Yanvar hadisələrini əks etdirən guşələr yaradılmışdır. Bundan əlavə, bütün məktəblərdə istedadlı şagirdlərin bu mövzuda çəkdikləri rəsmlərdən ibarət sərgilər təşkil edilmiş, inşa yazı müsabiqələrinə başlanılmışdır.
Ümumxalq Hüzn Gününədək isə məktəblərdə matəm mitinqləri keçiriləcək, xüsusi divar qəzetləri buraxılacaq, bülletenlər, stendlər, guşələr yaradılacaq, vətənpərvərlik mövzusunda bədii qiraət gecələri təşkil ediləcəkdir.
Gəncə məktəbliləri yanvarın 20-də keçiriləcək şəhidləri anma mərasimlərində də fəallıq göstərəcəklər. Həmin gün onlar Gəncədəki Şəhidlər xiyabanını ziyarət edəcək, ümumşəhər anma mərasimində 20 Yanvar şəhidlərinə həsr olunmuş şeirlər söyləyəcək, ədəbi-bədii kompozisiyalar göstərəcəklər.
Bölmənin digər xəbərləri
