Gəncənin Şəhidlər xiyabanında ümumşəhər iməciliyi keçirilmişdir
Gəncə, 14 yanvar (AZƏRTAC). Gəncənin Şəhidlər xiyabanında ümumşəhər iməciliyi keçirilmişdir.
Şəhərin idarə, müəssisə və təşkilatlarının, eləcə də ali və orta təhsil ocaqları kollektivlərinin iştirakı ilə keçirilən aksiya zamanı abidə kompleksinin ərazisində abadlıq və təmizlik işləri aparılmış, yaşıllıqlara qulluq edilmişdir. Bundan başqa, xiyabanın genişləndirilməsi məqsədilə əraziyə münbit torpaq daşınmış və əkin üçün yararlı hala salınmışdır.
Aksiya iştirakçısı, Gəncə Dövlət Universitetinin baş müəllimi Mübariz Əliyev AZƏRTAC-a demişdir ki, Azərbaycanın müstəqilliyi və ərazi bütövlüyü uğrunda şəhid olan oğul və qızlarımıza ehtiram göstərmək, onların uyuduqları məzarları ziyarət etmək hər birimizin mənəvi borcumuzdur. Elə bu məqsədlə universitetimizin kollektivi tez-tez şəhidlər xiyabanında olur, buradakı 368 şəhid məzarının ətrafında təmizlik və abadlıq işləri görür. Bugünkü iməcilik də məhz həmin məqsədi daşıyır və hamı kimi biz də 20 Yanvar faciəsinin 23-cü ildönümü ərəfəsində keçirilən aksiyada fəallıqla iştirak edəcəyik.
Bölmənin digər xəbərləri
