SİYASƏT
Gənclər Fondunun rəsmisi: Dörd minə yaxın gəncin iştirakı ilə forum keçiriləcək
![Gənclər Fondunun rəsmisi: Dörd minə yaxın gəncin iştirakı ilə forum keçiriləcək](/files/2023/3/1200x630/1701865777499737800_1200x630.jpg)
Bakı, 6 dekabr, AZƏRTAC
“Gənclər Fondu tərəfindən qayıdış könüllüləri formalaşdırılıb. Biz Şuşada, Zəngilan rayonunun Ağalı kəndində artıq işimizi qurmuşuq. Fond Qərbi Azərbaycan İcması ilə birgə layihələr həyata keçirir”.
AZƏRTAC xəbər verir ki, bu fikirləri Gənclər Fondunun icraçı direktoru vəzifəsini icra edən Qədir Xəlilov “Keçmişdən gələcəyə çağırış: Qərbi Azərbaycana qayıdış fəlsəfəsinə gənclərin baxışı” mövzusunda dekabrın 6-da keçirilən ictimai dinləmə zamanı səsləndirib.
Q.Xəlilov Fondun Qərbi Azərbaycana qayıdışla bağlı qrant və layihələrin keçirilməsi istiqamətində bütün dəstəyi əsirgəməyəcəklərini diqqətə çatdırıb.
“Hazırda könüllülük həftəsi keçirilir. Bu yaxınlarda 4 minə yaxın gəncin iştirakı ilə forum keçiriləcək. Biz panel iclaslarından birini məhz Qərbi Azərbaycana qayıdış mövzusuna həsr edəcəyik”, - deyə Gənclər Fondunun rəsmisi diqqətə çatdırıb.
Gəncləri fəal olmağa çağıran Q.Xəlilov onların ideya və təkliflərlə çıxış etmələrinin vacibliyini qeyd edib.