Giorgi Kvirikaşvili: Azərbaycan-Gürcüstan dostluğunun qiyməti yoxdur
Tbilisi, 29 may, AZƏRTAC
“Bu gün Azərbaycan, Gürcüstan və Türkiyə çox böyük və iddialı nəqliyyat və enerji layihələri üzərində işləyirlər. İnanırıq ki, bu layihələr regionun gələcəyini daha parlaq edəcək və beynəlxalq əhəmiyyətli olacaq”.
AZƏRTAC xəbər verir ki, bu sözləri Gürcüstanın Baş naziri Georgi Kvirikaşvili Azərbaycan Xalq Cümhuriyyətinin yaranmasının 100 illik yubiley tədbirində deyib.
Baş nazir qeyd edib ki, keçən ilin avqustunda Bakıda Bakı-Tbilisi-Qars dəmir yolunun rəsmi açılışı oldu. Bu ilin iyununda isə TANAP-ın rəsmi açılışını planlaşdırırıq. Bu da Azərbaycan, Gürcüstan və Türkiyənin regional əməkdaşlığının daha bir nailiyyətidir.
Kvirikaşvili həmçinin, bildirib ki, Azərbaycan Gürcüstanın ən iri ticarət tərəfdaşı və investorlarından biridir və bu dinamika inkişaf edir”.
Azərbaycanın gürcü xalqına yardımlarına toxunan hökumət başçısı deyib: “Bizim ölkələrimiz arasındakı dostluğun qiyməti yoxdur. Azərbaycan son 10 ildə bizim enerji problemimizin həllində, təbii fəlakətlərin fəsadlarının aradan qaldırılmasında bizə çox böyük yardımlar edib, köməklik göstərib. Gürcü xalqı bunu heç zaman unutmayacaq”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
