“Goldman Sachs” Avropada təbii qazın qiyməti ilə bağlı proqnozunu yüksəldib
Bakı, 23 iyul, AZƏRTAC
ABŞ-nin qabaqcıl investisiya banklarından olan “Goldman Sachs” Yaxın Şərqdəki gərginlik səbəbindən Avropada təbii qazın qiyməti ilə bağlı qısamüddətli proqnozunu yuxarı istiqamətdə yenidən nəzərdən keçirib.
AZƏRTAC xəbər verir ki, bank bu ilin üçüncü və dördüncü rübləri üçün Niderlandın TTF habında təbii qazının qiyməti ilə bağlı proqnozlarını müvafiq olaraq meqavat/saat üçün 41 avrodan 60 avroya və 40 avrodan 53 avroya yüksəldib. 2027-ci il üzrə isə qiymət proqnozu meqavat/saat üçün 30 avrodan 31 avroya artırılıb. Hörmüz boğazından daşınmaların gözləniləndən daha sürətli bərpa olunacağı təqdirdə qiymətlərin meqavat/saat üçün təxminən 40 avroya düşə biləcəyi bildirilib.
“Goldman Sachs” Hörmüz boğazının dəniz nəqliyyatı üçün tam açıq qaldığını fərz edərək 2028-ci və 2029-cu illər üçün aşağı qiymət proqnozunu saxlayıb. Bank qaz qiymətinin 2028-ci ildə meqavat/saat üçün 19 avro, 2029-cu ildə isə 16 avro olacağını proqnozlaşdırır. Həmçinin qeyd edilib ki, ABŞ-də istifadəyə veriləcək yeni LNG ixrac layihələri, eləcə də Asiyada kömür və bərpaolunan enerji istehsalında potensial artımlar orta və uzunmüddətli perspektivdə təbii qaz qiymətlərinə əlavə aşağı təzyiq yarada bilər.
Yaxın Şərqdə davam edən gərginliyin Körfəzdən mayeləşdirilmiş təbii qaz (LNG) ixracının gözləniləndən daha yavaş bərpasına səbəb olacağı bildirilib. Bank, həmçinin Yaxın Şərqdəki gərginlik səbəbindən Körfəzdən LNG ixracının normallaşma tarixi ilə bağlı gözləntilərini iyuldan oktyabr ayına təxirə salıb.
Yay mövsümünün qalan hissəsində qlobal LNG tədarükündə illik müqayisədə 16 milyon ton (təxminən 4 faiz) azalma proqnozlaşdırılıb. Bank Şimal-Qərbi Avropadakı təbii qaz anbarlarının oktyabr ayının sonuna, qış mövsümünün başlanğıcına qədər 67 faiz tutumda qalacağını gözləyir. “Goldman Sachs” daha əvvəl eyni dövr üçün tutumun 74 faiz olacağını proqnozlaşdırmışdı. Temperatur normallaşarsa, saxlama tutumunun mart ayının - qış mövsümünün sonuna qədər 28 faizə düşəcəyi gözlənilir.
“Goldman Sachs” Yaxın Şərqdə enerji ixracının 2027-ci il ərzində yalnız tədricən normallaşacağı ssenaridə isə Asiya tələbatını kifayət qədər azaltmaq üçün Avropadada qazın qiymətinin meqavat/saat üçün 100 avrodan yuxarı qalxa biləcəyini də proqnozlaşdırıb.
Qeyd edək ki, qlobal neft tədarükünün təxminən beşdəbiri və qlobal LNG ixracının isə 20 faizi Hörmüz boğazından keçir.
Bölmənin digər xəbərləri
