“Görmənin fiziologiyası və peşə patologiyaları: fundamental və tətbiqi aspektlər” - beynəlxalq konfrans
Bakı, 30 oktyabr, AZƏRTAC
Oktyabrın 30-da Ümummilli Lider Heydər Əliyevin və akademik Zərifə Əliyevanın 100 illik yubileylərinə həsr edilmiş “Görmənin fiziologiyası və peşə patologiyaları: fundamental və tətbiqi aspektlər” mövzusunda beynəlxalq konfransın və Azərbaycan Fizioloqlarının VI Konqresinin açılış mərasimi olub.
AZƏRTAC xəbər verir ki, açılış mərasimi AMEA Rəyasət Heyəti, Səhiyyə Nazirliyi, AMEA-nın Biologiya və Tibb Elmləri Bölməsi, akademik Zərifə Əliyeva adına Milli Oftalmologiya Mərkəzi, Elm və Təhsil Nazirliyi akademik Abdulla Qarayev adına Fiziologiya İnstitutu və Azərbaycan Fizioloqlar Cəmiyyətinin birgə təşkilatçılığı ilə reallaşıb.
Əvvəlcə tədbir iştirakçıları Fəxri xiyabanda Ulu Öndər Heydər Əliyevin və akademik Zərifə Əliyevanın məzarlarını ziyarət ediblər. Ümummilli Liderin və görkəmli oftalmoloq-alimin məzarları önünə əklil və gül dəstələri qoyulub, onların əziz xatirəsi dərin ehtiramla yad edilib.
Həmçinin iştirakçılar Ulu Öndərin Mərkəzi Elmi Kitabxanadakı (MEK) büstü önünə gül dəstələri düzərək, dahi Liderin əziz xatirəsinə ehtiramlarını bildiriblər. Daha sonra MEK-in foyesində Ulu Öndərə və akademik Zərifə Əliyevaya həsr edilmiş sərgiyə baxış keçirilib.
Tədbir Dövlət Himninin səsləndirilməsi ilə başlanıb.
AMEA-nın prezidenti akademik İsa Həbibbəyli beynəlxalq tədbirin elmi əhəmiyyətini vurğulayıb, konfransda Türkiyə, Rusiya, Belarus, Gürcüstan və digər ölkələrdən alim və mütəxəssislərin, tanınmış fizioloqlarin iştirak etdiyini diqqətə çatdırıb. İ.Həbibbəyli 2023-cü ilin Prezident İlham Əliyev tərəfindən “Heydər Əliyev İli” elan olunduğunu xatırladaraq, il boyu ölkəmizdə və xaricdə, eləcə də AMEA-da görkəmli dövlət xadiminə həsr olunmuş silsilə tədbirlərin keçirildiyini söyləyib. O, bu tədbirlərin böyük elmi-mədəni hadisələrlə, Azərbaycanın taleyüklü məsələləri ilə daha da yaddaqalan olduğunu bildirib.
Akademik Zərifə Əliyevanın zəngin elmi irsindən, Azərbaycan oftalmologiya elminin inkişafındakı xidmətlərindən danışan AMEA rəhbəri alimin elmi məktəb yaratdığını, elmi kadrların yetişdirilməsi istiqamətində əhəmiyyətli işlər gördüyünü söyləyib. O, Zərifə xanımın həm də görkəmli ictimai xadim olduğunu deyərək alimin Ulu Öndərin apardığı böyük dövlətçilik fəaliyyətinə daim dəstək verdiyini qeyd edib.
“Konfransın keçirildiyi günlər Azərbaycanın çoxəsrlik tarixinin nadir hadisələrinin baş verdiyi günlərə təsadüf edir”, - deyən İ.Həbibbəyli Prezident İlham Əliyevin prinsipial mövqeyi və diplomatik fəaliyyəti sayəsində tarixi ədalətin qələbə çaldığını və Azərbaycanın ərazi bütövlüyünün, suverenliyinin tam bərpa edildiyini vurğulayıb. O, bu gün Azərbaycanın Dövlət Bayrağının Qarabağda, ölkəmizin hər yerində vüqarla dalğalandığını qeyd edib.
Çıxışının sonunda AMEA prezidenti konfransda səslənəcək fikirlərin elmimizin inkişafına töhfə verəcəyinə inamını ifadə edib.
Milli Məclisin Səhiyyə komitəsinin sədri akademik Əhliman Əmiraslanov çıxış edərək Ulu Öndərin və akademik Zərifə Əliyevanın xatirəsinə həsr edilmiş konfransın miqyasına, əhatə dairəsinə görə mötəbər və yaddaqalan olacağına əminliyini bildirib. Vurğulayıb ki, xalqımız hər iki görkəmli şəxsiyyəti daim böyük hörmət və ehtiramla anır, onların Vətənimiz və xalqımız üçün xidmətlərini xüsusi minnətdarlıqla xatırlayır. Ə.Əmiraslanov Zərifə xanımın nəinki Azərbaycanda, SSRİ miqyasında gözün peşə patologiyası ilə ciddi məşğul olan və öz sözünü deyən ilk mütəxəssis olduğunu söyləyib. O, görkəmli alimin oftalmologiyanın son dərəcə ağır sahələri ilə məşğul olduğunu, genişmiqyaslı fəaliyyəti ilə yeni nəticələr əldə etdiyini diqqətə çatdırıb.
Tədbirdə çıxış edən səhiyyə nazirinin müavini Nadir Zeynalov Ümummilli Lider Heydər Əliyevin ölkəmizə rəhbərlik etdiyi hər iki dövrdə elm, təhsil, tibb və digər sahələrin inkişafına göstərdiyi diqqət və qayğıdan, Zərifə xanım Əliyevanın Azərbaycan tibb elminin, oftalmologiya və fiziologiyanın inkişafına verdiyi dəyərli töhfələrdən söz açıb.
Nadir Zeynalov Səhiyyə Nazirliyinin AMEA ilə birgə akademik Zərifə Əliyevanın 100 illik yubileyi münasibətilə bir sıra tədbirlər keçirdiyini diqqətə çatdırıb. Qeyd edib ki, görkəmli alim oftalmologiyanın aktual problemlərinə həsr edilmiş çoxprofilli tədqiqatlar aparıb və ixtisaslaşdırılmış elmi-tədqiqat laboratoriyası məhz Zərifə xanımın təşəbbüsü ilə yaradılıb.
AMEA-nın vitse-prezidenti akademik İradə Hüseynova, Azərbaycan Dövlət İqtisad Universitetinin (UNEC) Türk dünyası iqtisad fakültəsinin dekanı Mehmet Yüce, Rusiya Elmlər Akademiyasının İ.P.Pavlov adına Fiziologiya İnstitutunun Görmənin fiziologiyası laboratoriyasının müdiri Yuri Şelepin, akademik Zərifə Əliyeva adına Milli Oftalmologiya Mərkəzinin direktoru Elmar Qasımov, akademik A.Qarayev adına Fiziologiya İnstitutunun direktoru Ulduz Həşimova, Azərbaycan Tibb Universitetinin kafedra müdiri professor Paşa Qəlbinur, Gürcüstanın İ.Beritaşvili adına Eksperimental Biotibb Mərkəzinin laboratoriya müdiri Merab Tsaqareli, Özbəkistan Respublikası Səhiyyə Nazirliyi Mərkəzi Asiya Tibb Universitetinin tədris işləri və beynəlxalq əlaqələr üzrə prorektoru Murodjon Botirov və başqaları çıxış edərək akademik Zərifə Əliyevanın zəngin irsinin, tibbin müxtəlif sahələri üzrə apardığı tədqiqatlarının və fundamental əsərlərinin Azərbaycan elminin inkişafındakı müstəsna rolundan danışıb, beynəlxalq konfransın işinə uğurlar arzulayıblar.
Konfrans işini plenar və bölmə iclasları ilə davam etdirir. Tədbirə oktyabrın 31-də yekun vurulacaq.
Bölmənin digər xəbərləri
