GÖYÇAY ÇAYINDAN UCAR ƏRAZİSİNƏ SU ARXI ÇƏKİLİR
Regionların sosial-iqtisadi inkişafı Dövlət Proqramına əsasən uzunluğu 11,5 kilometr olacaq yeni su arxı Ucar rayonunun Yuxarı Şilyan kəndini və ərazidəki 2 min hektar əkin sahəsini təsərrüfat suyu ilə tam təmin edəcəkdir. Su arxı dövlət vəsaiti hesabına çəkilir və bu iş müsabiqədə qalib gəlmiş “Ucar tikinti-quraşdırma” Açıq Səhmdar Cəmiyyəti tərəfindən görülür.
Ucar Rayon İcra Hakimiyyətində AZƏRTAC-ın müxbirinə bildirmişlər ki, smeta dəyəri 1 milyard 934 milyon manat olan arxın çəkilişinə bir aydır ki, başlanmışdır və hazırda Göyçay çayındakı baş qurğuda tikinti işləri aparılır. Arxın gələn təsərrüfat ilinədək istifadəyə verilməsi nəzərdə tutulmuşdur.
Bölmənin digər xəbərləri
