REGİONLAR
Göyçayda heyvanlar arasında profilaktik peyvəndləmə tədbirləri aparılır
Bakı, 27 fevral, AZƏRTAC
Cari ilin ilk günlərindən başlayaraq ölkə ərazisində olduğu kimi, Göyçay rayonunda da kənd təsərrüfatı heyvanları arasında profilaktik peyvəndləmə tədbirlərinin və diaqnostik müayinələrin icrasına start verilib.
Kənd Təsərrüfatı Nazirliyi yanında Dövlət Baytarlıq Xidmətindən AZƏRTAC-a bildiriblər ki, Göyçay Rayon Baytarlıq İdarəsi tərəfindən cari ilin tədbirləri başlayandan indiyə kimi rayonun ayrı-ayrı şəxsi təsərrüfatlarında saxlanılan 35330 baş iribuynuzlu, 289 baş təkdırnaqlı heyvanda qarayara, 2050 baş həyət itində quduzluq, 101694 baş ev quşunda (“La-sota” vaksini ilə) nyukasl xəstəliklərinə qarşı profilaktik peyvəndləmə və 3100 kvadratmetr sahədə profilaktik dezinfeksiya işləri görülüb.
Həmçinin həssas heyvanlar arasında bruselyoz xəstəliyini aşkar etmək, xəstəliyin yayılmasının qarşısını almaq məqsədilə 2248 baş iribuynuzlu heyvandan qan nümunəsi alınaraq bruselyoza görə seroloji müayinə edilib.
Fevralın 10-dan isə Göyçay rayonunda iribuynuzlu heyvanlar arasında dabaq xəstəliyinə qarşı (A, O, “Asiya-1”, “Tur-15” tiplərinə qarşı) peyvəndləmə tədbirinə başlanılıb. Artıq 62950 baş iribuynuzlu heyvanda bu tədbir aparılıb.
Ümumiyyətlə, Göyçay rayonunun 1 şəhər və 54 kəndində 37 min baş iribuynuzlu, 60 min baş xırdabuynuzlu, 4900 baş it və 700 min başdan artıq ev quşu mövcuddur.
Baytar mütəxəssisləri həm də maariflənmə işi apararaq, iti yoluxucu xəstəliklər barədə təsərrüfat sahiblərinə ətraflı məlumat verir, təsərrüfatlarında baytarlıq-sanitariya qaydalarına ciddi əməl olunmasını tövsiyə edirlər.
Maariflənmə işlərinə rayonda fəaliyyət göstərən aqrar inkişaf könüllüləri də dəstək verir. Aqrar inkişaf könüllülərinin əsas məqsədi aqrar sahənin inkişafına dəstək vermək, aqrar sahədəki problemləri müəyyənləşdirmək, həll yollarını tapmaq, innovativ texnologiyaların tətbiqinə nail olmaq, cəmiyyətin diqqətini aqrar sahəyə yönəltmək və bu sahədə gələcək üçün karyera qurmaqdır. Hazırda Göyçayda Dövlət Aqrar İnkişaf Mərkəzi ilə birlikdə yaradılmış 10 nəfərdən ibarət aqrar könüllülər bu fəaliyyətlə məşğuldur.
Göyçay rayonu ərazisində saxlanılan heyvanlarda bundan sonra da peyvəndləmə tədbirləri davam etdiriləcək. Belə ki, iribuynuzlu heyvanlarda dabaq, nodulyar dermatit, xırdabuynuzlu heyvanlarda qarayara, dabaq, çiçək, leptospiroz, quşlarda nyukasl və digər xəstəliklərə qarşı profilaktik peyvəndləmə tədbirləri aparılacaq.
Dövlət Baytarlıq Xidməti bildirir ki, rayon (şəhər) baytarlıq idarələri baytarlıq preparatları, lazımi ləvazimat və avadanlıqlarla təmin edilib.
Hazırda xüsusi təhlükəli xəstəliklərə görə respublikada epizootik vəziyyət sabitdir.