GÜCLÜ QASIRĞA, LEYSAN, SEL VƏ İLDIRIM ALMANİYANIN ŞİMAL-ŞƏRQ BÖLGƏLƏRİNƏ CİDDİ ZİYAN VURMUŞDUR

22.07.2004 [19:54]
Çap et
A⁺ A^-

AZƏRTAC-ın xüsusi müxbiri xəbər verir ki, son günlər Almaniyanın ayrı-ayrı ərazilərində tüğyan edən güclü qasırğa, leysan və ildırımla müşayiət olunan tufan indi də ölkənin şimal-şərq bölgəsini sınağa çəkmişdir. İyulun 20-dən 21-ə keçən gecə leysan və ildırım çaxmaları ilə başlayan tufan Berlin, Brandenburq, Saksoniya və Türingiya əyalətlərində ciddi dağıntılar törətmişdir. Berlin üzərində 20 dəqiqə müddətində aramsız şaqqıldayan ildırım şəhərin Sellendorf və Şpandau rayonlarında iki yaşayış binasını vuraraq yanğın törətmişdir.

Güclü qasırğa ağacları kökündən qopararaq küçələrə, yollara yıxmış, rabitə, elektrik xətlərini zədələmiş, nəqliyyatın hərəkətini dayandırmışdır.

Paytaxtda və digər bölgələrdə fövqəladə vəziyyət elan olunmuş, polis, yanğınsöndürənlər və əhali küçələri, mənzil və zirzəmiləri basan sellə mübarizəyə cəlb olunmuşdur.

Selin dəmir yollarını basması səbəbindən Berlin-Hamburq istiqamətində qatarların hərəkəti müvəqqəti dayandırılmışdır.