GÜLƏŞ ÜZRƏ “QIZIL QRAN-PRİ” BEYNƏLXALQ TURNİRİNİN FİNAL MƏRHƏLƏSİ BAKIDA KEÇİRİLƏCƏK

26.05.2006 [10:53]
Çap et
A⁺ A^-

Azərbaycan Güləş Federasiyasından AZƏRTAC-a bildirmişlər ki, iyunun 23-25-də Heydər Əliyev adına İdman-Konsert Kompleksində “Qızıl Qran-pri” beynəlxalq turnirinin final görüşləri keçiriləcəkdir.

Kişilər arasında sərbəst və yunan-Roma güləşi üzrə, qadınlar arasında isə sərbəst güləş üzrə keçiriləcək yarışlarda 12 ölkənin (Türkiyə, Rusiya, Ukrayna, Belarus, Kanada, Almaniya, Bolqarıstan, Gürcüstan, Qazaxıstan, İran, Misir və Moldova) komandaları iştirak edəcəkləri barədə Təşkilat Komitəsinə məlumat vermişlər.

Xatırladaq ki, ilin əvvəlindən başlayaraq Rusiyanın Krasnoyarsk və Özbəkistanın Daşkənd şəhərlərində sərbəst, Türkiyənin İstanbul və Bolqarıstanın Sofiya şəhərlərində yunan-Roma güləşi üzrə “Qızıl Qran-pri” yarışlarının təsnifat görüşləri keçirilmişdir.

Azərbaycan güləşçiləri həmin təsnifat görüşlərini uğursuz başa vursalar da, ev sahibi kimi, yarışların final mərhələsində iştirak edəcəklər.