Günnüt zəfərini qazanan igidlərimizin səsi Qarabağdan, Şərqi Zəngəzurdan gəldi - MƏQALƏ
Naxçıvan, 20 may, AZƏRTAC
“Bölgələrdən AZƏRTAC üçün yazırlar”: Jurnalist Ramiyə Əkbərovanın 2018-ci ilin mayın 20-dən 27-dək davam edən və Azərbaycan Ordusunun qalibiyyəti ilə yekunlaşan Günnüt əməliyyatı barədə məqaləsini təqdim edirik.
Artıq 7 ildir ki, Naxçıvan-Sədərək magistral yolunun kənarındakı “Günnüt” yazılan lövhəyə baxanda qürur hissi keçiririk. Çünki bu lövhənin göstərdiyi istiqamətə gedən yol bizi azad Vətən torpağına aparır. Amma sadəcə bir yol deyil bu yol. Qəhrəmanlıq dastanı, şərəf, qeyrət, igidlik yoludur.
30 il bundan öncə həmin lövhəyə baxanda bunları görürdük: Ötən əsrin 90-cı illəri yaddaşımıza həm çətin, həm də birlik, qəhrəmanlıq illəri kimi yazılıb. Həmin illərdə Azərbaycan bədnam qonşularımızın hücumuna məruz qalmışdı. Muxtar respublikadakı vəziyyət isə heç də ürəkaçan deyildi. Düşmən hücumları ilə bərabər, blokadaya da alınan yurdumuzda insanlar çətin də olsa düşmən hücumlarının qarşısını mərdliklə alır, geri çəkilmirdilər. O günlərdə Şərur rayonunun Sədərək, Günnüt, Havuş və Şahbulaq kəndləri aramsız düşmən hücumlarına məruz qalırdı. Mənfurların atdıqları mərmilər rayon mərkəzinə belə düşürdü. Sədərəkdə qanlı döyüşlər getdiyi vaxtda düşmənə əsir düşən Günnüt qəlbimizin sızlayan yarasına çevrilmişdi. O Günnüt ki, orada Asəf Rəhimov kimi oğullar son ana kimi döyüşərək, düşmənə əsir düşməmək üçün axırıncı gülləsi ilə öz canına qıymışdı. Onun da ruhu düz 26 il idi ki, həsrətlə yolumuzu gözləyirdi. Gözləri yol çəkdikcə doğma yurdun igidlərinin səbri tükənirdi. Və həmin gün – 2018-ci ilin bir yaz səhəri hamını sevinc göz yaşına boğan bir xəbər gəldi: Günnüt azaddır. Bu iki söz illərdir yollara dikilən gözləri sevincə, xoşbəxtliyə qərq etdi. Bu iki kəlmənin sədası düşməni qorxuya saldı. Elə bir qorxuya ki, bu xəbərin düzgünlüyünü təsdiq edəcək cəsarətləri olmadı. Erməni hakimiyyəti onlar üçün utancverici bu hadisəni günlərlə öz xalqından gizlətdi.
Müzəffər Ali Baş Komandan, Prezident İlham Əliyev 2021-ci ilin may ayında muxtar respublikaya səfəri zamanı Günnüt zəfəri haqqında deyib: “Naxçıvanın müdafiə potensialının möhkəmlənməsinə həmişə böyük diqqət göstərilib. Naxçıvan Əlahiddə Ümumqoşun Ordunun döyüş qabiliyyəti də yerindədir və uğurlu Günnüt əməliyyatı – üç il bundan əvvəl keçirilmiş əməliyyat bunun bariz nümunəsidir. O əməliyyat Ermənistanda hakimiyyət dəyişikliyinə təsadüf etdi, ona görə hakimiyyətə gəlmiş yeni iqtidar bunu bir növ ört-basdır etməyə çalışdı. Biz də heç üstünü vurmadıq. Çünki bizə hansısa təbliğat yox, real iş lazımdır. Biz çox önəmli strateji yüksəklikləri Ermənistan ordusundan təmizlədik, o yüksəklikləri əldə etdik. Bu yüksəkliklər imkan verdi ki, biz artıq strateji kommunikasiyalara tam nəzarət edirik və Ermənistandan Dağlıq Qarabağa gedən yola da nəzarət edirik. İkinci Qarabağ müharibəsində bu yola nəzarət imkanlarımız bizə bir çox informasiyanın əldə edilməsində kömək göstərdi. Qarşı tərəf bilir ki, bizim nəzarətimizdə olan bu kommunikasiyalar istənilən vaxt kəsilə bilər və əlbəttə, öz addımlarını buna uyğun atmalıdır. Yəni Günnüt əməliyyatı Naxçıvan Ordusunun potensialını göstərdi, Azərbaycan Ordusunun potensialını göstərdi”.
Bəli, 26 il sonra - 2018-ci il may ayında Günnüt kəndi və ətrafındakı mühüm strateji əhəmiyyətli yüksəkliklər Əlahiddə Ümumqoşun Ordunun əks-həmlə əməliyyatları ilə işğaldan azad edildi. Bununla da ordumuz daha əlverişli mövqelərə sahibləndi, əməliyyat nəticəsində Xunut dağı və Ağbulaq yüksəkliyi, daha sonra isə Qızılqaya dağı və Mehridağ işğaldan azad edilərək Dərələyəz mahalının Arpa kəndi (ermənilər adını dəyişdirərək “Areni” qoymuşdular) nəzarət altına keçdi. Ümumilikdə, 11 min hektara yaxın ərazi düşməndən azad edildi. Bu ərazinin 8 min hektardan çoxu əkin üçün, xüsusilə dəmyə əkinçiliyi üçün yararlı ərazilərdir. Şərur rayonunun Günnüt kəndini nəzarətdə saxlamağa imkan verən, dəniz səviyyəsindən 1683 metr hündürlükdə yerləşən Qızılqaya yüksəkliyinin ən böyük strateji əhəmiyyəti isə ordumuza İrəvan-Yexeqndzor-Gorus-Laçın-Xankəndi avtomobil yoluna nəzarət etməyə imkan yaratmasıdı. Strateji əhəmiyyətli Arpaçay su dəryaçasının taktiki cəhətdən etibarlı mühafizəsinin təşkili üçün hakim yüksəkliklərdə yeni müdafiə mövqeləri quruldu.
Günnüt zəfəri ilə addım-addım Böyük Qələbəyə doğru gedən yola nəzər salanda gördüklərimiz qəlbimizi qürurla doldurur. Bir vaxtlar Qızılqayadan baxıb Qarabağımızın başı qarlı dağlarını görəndə, görəsən, nə vaxt o dağlara, o ellərə əbədi qayıdacağıq, Qarabağda nə vaxt toy-büsat quracağıq deyirdik. Günnüt zəfərindən cəmi 2 il sonra, 2020-ci ildən etibarən Qızılqayadan o ellərə fəxrlə baxırıq. Bu gün fəxr və qürur hissi ilə deyirik ki, Günnüt zəfərini qazanan igidlərimizin səsi Vətən müharibəsində Şuşadan, Cəbrayıldan, Zəngilandan gəldi. Həm Aprel döyüşləri, həm Günnüt zəfəri Azərbaycan əsgərinin gücünü bir daha göstərdi. Bu Qələbə yürüşümüz ərazi bütövlüyümüz bərpa olunana kimi davam etdi və şanlı bayrağımız bütöv Azərbaycanın başı üstündə dalğalanıb, “Gözün aydın, Vətən!” - dedi.
Bölmənin digər xəbərləri
