Gürcüstan bu il 1100 xarici vətəndaşı deportasiya edib
Tbilisi, 9 dekabr, AZƏRTAC
Gürcüstan Daxili İşlər Nazirliyinin (DİN) Miqrasiya Departamenti ilin əvvəlindən bu günədək 1100 nəfəri ölkədən deportasiya edib.
AZƏRTAC xəbər verir ki, bu barədə Gürcüstan DİN məlumat yayıb. Bildirilir ki, təkcə son bir neçə gün ərzində 26 xarici vətəndaş ölkədən çıxarılıb. İl ərzində ölkədən deportasiya olunanlar arasında Hindistan, İran, Türkiyə, Türkmənistan, Çin, Kuba, Nigeriya, Misir, Livan Kamerun və Pakistan vətəndaşları çoxluq təşkil edib.
Yeni qanunlara görə, əgər xarici ölkə vətəndaşı Gürcüstanda 3 aya qədər qalmaq (90 gün) müddətini bitiribsə, 1000 lari (369 dollar) cərimə olunur, ölkədən çıxarılır və 6 aydan tez Gürcüstana girişinə icazə verilmir. Əgər xarici vətəndaş 3 aydan 1 ilədək qanunsuz olaraq Gürcüstan ərazisində qalıbsa, 2 min lari (738 dollar) cərimə olunur və 2 il müddətinə Gürcüstana girişi qadağan olunur. Bir ildən artıq Gürcüstan ərazisində qeyri-qanuni yaşayan xarici ölkə vətəndaşları isə 3 min lari məbləğində cərimə olunur və 3 il müddətinə Gürcüstana girişinə qadağa tətbiq olunur.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
