Gürcüstan nəqliyyat və logistika infrastrukturunu gücləndirməyə davam edir
Tbilisi, 16 iyul, AZƏRTAC
Gürcüstan hökuməti Orta Dəhlizi daha sürətli, daha səmərəli və daha rəqabətli etmək üçün nəqliyyat və logistika infrastrukturunu gücləndirməyə davam edəcək.
AZƏRTAC xəbər verir ki, bu sözləri Gürcüstanın Baş naziri İrakli Kobaxidze Gürcüstan - Türkmənistan biznes-forumundakı çıxışı zamanı deyib. Onun sözlərinə görə, Gürcüstan və Türkmənistan bir-biri üçün sadəcə ticarət tərəfdaşları deyil. Hər iki ölkə Avropa ilə Asiya arasında mühüm körpülər təşkil edir və regional əlaqənin və beynəlxalq ticarətin gücləndirilməsində ortaq maraqları bölüşürlər.
“Bu ortaq strateji üstünlüklərə əsaslanaraq, biz Orta Dəhlizin inkişafına xüsusi əhəmiyyət veririk”, - deyə Gürcüstanın Baş naziri İrakli Kobaxidze bildirib.
Baş nazir deyib ki, Orta Dəhliz getdikcə qlobal əhəmiyyət kəsb edən və Avropa ilə Asiya arasında yük daşınması üçün yeni imkanlar yaradan bir marşrutdur.
Gürcüstanın nəqliyyat və logistika infrastrukturunu gücləndirməsi işində dəmir yolunun modernləşdirilməsi, Şərq-Qərb avtomobil yolunun inkişafı və Anakliya dərin dəniz limanının tikintisi xüsusi yer tutur.
Bölmənin digər xəbərləri
