GÜRCÜSTAN PREZİDENTİNİN XANIMI AZƏRBAYCAN DÖVLƏT XARİCİ DİLLƏR UNİVERSİTETİNDƏ OLMUŞDUR
AZƏRTAC xəbər verir ki, Gürcüstan Prezidentinin xanımı Sandra Elizabet Rulofs martın 22-də Azərbaycan Xarici Dillər Universitetində olmuşdur.
Milli geyimli tələbə qızlar hörmətli qonağı gül-çiçəklə qarşıladılar. Universitetin rektoru Səməd Seyidov xanım Rulofsu ali məktəbdə fəaliyyət göstərən müxtəlif tədris mərkəzləri - Avstriya mədəniyyət mərkəzi, alman oxu zalı, Jorj Sand adına Fransa mediatekası ilə tanış etdi.
Sonra universitetin akt salonunda xanım Rulofsun ali məktəbin tələbələri və professor-müəllim heyəti ilə görüşü oldu. Qonaq Gürcüstanın birinci xanımı kimi üzərinə düşən vəzifələrdən danışaraq bildirdi ki, bu vəzifələr sırasına təhsil, səhiyyə və qeyri-hökumət təşkilatları ilə bağlı müxtəlif məsələlərə himayədarlıq daxildir. O, Azərbaycan Prezidentinin xanımı Mehriban Əliyeva ilə keçirdiyi görüşlərindən, tibb sahəsində, o cümlədən əhalisinin böyük əksəriyyətini azərbaycanlılar təşkil edən Marneuli rayonunda tibbi xidmətin səviyyəsinin yüksəldilməsi sahəsində birgə layihələrin həyata keçirilməsinə dair əldə olunan razılaşmalardan söhbət açdı.
Sonra xanım Rulofs universitetin tələbə və müəllimlərinin suallarına cavab verdi.
Ali məktəbin rəqs ansamblı və xorunun iştirakı ilə konsert oldu. Konsertdə Azərbaycan və ingilis dillərində mahnılar səsləndi.
Bölmənin digər xəbərləri
